“Эрдэнэт” үйлдвэрийг барьцаалан “Стандарт” банкнаас зээл авсан гэх “Жаст” группийн ерөнхийлөгч асан Ш.Батхүү нарт холбогдох хэргийг Авлигатай тэмцэх газар /АТГ/-аас шалгаж байна. Эх сурвалжийн мэдээлснээр, Ш.Батхүү нар холбогдсон хэрэг мөрдөн байцаалтын явцад хамрах хүрээ нь томорсоор буй аж. Тиймээс АТГ-ын Мөрдөн шалгах хэлтсээс тусгай ажлын хэсэг томилогдож Ш.Батхүү нарыг мөрдөн шалгах ажиллагааг нарийвчлан явуулж эхэлжээ. Хэргийн мөрдөн шалгах ажиллагаанд прокурор давхар хяналт тавьж ажиллаж байгаа гэнэ.

Анх 2013 оноос дээрх хэрэгт Цагдаагийн Ерөнхий газрын Мөрдөн байцаах газрын эдийн засгийн хүнд гэмт хэрэгтэй тэмцэх хэлтсээс эрүүгийн хэрэг үүсгэн шалгаж байсан. Харин 2015 оноос АТГ-т уг хэрэг шилжжээ.  

Өнгөрсөн таван жил гаруйн хугацаанд хэргийн мөрдөн байцаалтад ахиц гарахгүй, хэргийг хөөн хэлэлцэх хуулийн хугацаа дуусах дөхлөө гэх мэдээллийг УИХ-ын зарим гишүүд өнгөрсөн долоо хоногт өгч байсан. Тэгвэл АТГ-аас “Жаст” группийн ерөнхийлөгч асан Ш.Батхүү нарт холбогдох хэргийн хөөн хэлэлцэх хугацаа дуусах болоогүй бөгөөд гэм буруутай этгээдүүд ял завших боломжгүй гэж мэдэгдлээ.

Д.УУДАМ