УИХ-ын гишүүн асан Д.Арвиныг улсад их хэмжээний хохирол учруулсан байж болзошгүй хэрэгт холбогдуулан Авлигатай тэмцэх газар /АТГ/-аас шалгажээ. Түүнийг Баянзүрх дүүргийн Хөдөлмөр халамж үйлчилгээний хэлтсийн Ахуйн үйлчилгээний цэг байгуулах 1.3 тэрбум төгрөг, Сургалтын төв байгуулах 150 сая төгрөг, нийт 1.5 тэрбум төгрөгийг хяналтгүй зарцуулсан байж болзошгүй гэж АТГ үзжээ.  

Түүнтэй хамт нэр бүхий зарим албан тушаалтан эрх мэдлээ хэтрүүлж, хууль тогтоомж зөрчин, төсвийн мөнгөний зарцуулалтад хяналт шалгалт хийгээгүйн улмаас улсад онц их хэмжээний хохирол учруулсан байж болзошгүй үйлдэлд АТГ эрүүгийн хэрэг үүсгэн шалгасан байна.

Ингээд энэ хэргийг өнгөрсөн хоёрдугаар сард АТГ-аас шалгаж дуусаад, прокурорт шилжүүлснээ эх сурвалж мэдээлэв.
Д.Арвин нь УИХ-д гурван удаа сонгогдон ажилласан ч 2016 оны сонгуульд ялагдал хүлээсэн юм. Одоо тэрбээр “Их өргөө” компаниа удирдаж буй аж.

Д.УУДАМ