АНУ-ын зүүн эргийн мужуудад хүчтэй цасан шуурга дэгдсэний улмаас цахилгаан тасарч, нийтийн тээврийн болон аялал жуулчлалын үйл ажиллагааг зогсоосон байна.

Тус улсын зүүн болон зүүн хойд эргийн мужуудад нэг сая гаруй иргэн гэрэл цахилгаангүй байгаагаас гадна Amtrak нийтийн тээврийн оператор компани галт тэрэгний үйлчилгээгээ  түр зогсоожээ. Хүчтэй цасан шуурга болон салхины улмаас АНУ даяар 2600 гаруй нислэг саатсан гэнэ. Бостон хотын далайн эрэг хавийн оршин суугчдыг нүүлгэн шилжүүлэх бэлтгэл ажил явагдаж байгаа талаар орон нутгийн удирдлагууд мэдээлсэн байна.

Виржиниа мужийн захирагч Ральф Нортам өчигдөр /2018.03.02/ мужид цаг агаарын онц ноцтой үзэгдлийн улмаас мужид онц байдал зарласан юм.

Массачусетс хотын далайн эрэг хавиар өчигдөр орон нутгийн цагаар 11.00 цагийн орчим хүчтэй салхины улмаас далайн давалгаа нэмэгдэж, ус эргээ хальсан тохиолдол гарчээ.

Ирэх хоногуудад салхи улам ширүүсч, түрлэг нэмэгдэх төлөвтэй байгаагаас Үндэсний цаг уурын шинжилгээний төвийн мэргэжилтнүүд иргэдэд анхааруулга гаргасан байна.

Вашингтон ДС мужид зарим газар салхины хурд 113км/ц-т хүрснээс мод, цахилгааны шугам унасан гэнэ. Цаг агаарын ноцтой байдлын улмаас өчигдөр тус муж дахь төрийн үйлчилгээний газруудыг түр хаасан байна.

Эх сурвалж: BBC