АНУ-ын Батлан хамгаалахын Ази-Номхон далайн аюулгүй байдлын асуудал эрхэлсэн дэд сайд Рендал Шравейр Монгол Улсад хоёрдугаар сарын 28-аас гуравдугаар сарын 2-ны өдрүүдэд айлчиллаа.

Энэ удаагийн айлчлалаар Монгол Улсад болон АНУ-д сурч, ажиллаж буй цэргийн алба хаагчид болон тэдний гэр бүлийн гишүүд тухайн цэргийн эмнэлгүүдээр үнэ төлбөргүй үйлчлүүлж байх гэрээ хэлэлцээрийг байгууллаа.

АНУ-ын Батлан хамгаалахын Ази-Номхон далайн аюулгүй байдлын асуудал эрхэлсэн дэд сайд Рендал Шравейр "Хоёр орны батлан хамгаалах салбарын түншлэлд АНУ тууштай хэвээр байх нь аль аль талдаа чухал ач холбогдолтой бөгөөд нийтлэг үнэт зүйлс, хамтын ашиг сонирхол дээр суурилсан гэдгийг би онцлон тэмдэглэмээр байна. Монгол улс бол Ази тивд төдийгүй дэлхийн энх тайван, тогтвортой байдалд боломжоосоо хавьгүй их хувь нэмэр оруулж байгаа ардчилсан, амар тайван орны жишээ болсон улс. Та бүхэн бусад улс үндэстнүүдэд үлгэр дуурайлал болж байгаа бөгөөд энэ хүрсэн амжилт ололтоороо бахархах нь зүй ёсны хэрэг юм" гэж онцоллоо.

Мөн дээрх уулзалтаар ирэх зургаадугаар сард Монгол Улсад 16 дахь жилдээ зохиогдох гэж буй Энхийг дэмжих ажиллагаа "Хааны эрэлд" олон улсын хээрийн сургуулийн талаар хоёр тал санал солилцов.

А.АНИР