“Монголын зөгийн аж ахуйн кластер” бизнес сургалт, уулзалтын талаар өнөөдөр /2018.03.02/ мэдээлэл хийлээ. Сургалт, уулзалт энэ сарын 3, 4-нд ‘Стар вэндоус’ төвд болох бөгөөд зөгийн аж ахуй эрхлэгчид, зөгийн аж ахуй сонирхогч, хэрэглэгчид оролцох боломжтой. 

Уулзалтаар зөгийн балын худалдаа болж, зөгийн аж ахуй эрхлэх сонирхолтой иргэдэд мэдээлэл өгч, ажлын байранд зуучлах зэрэг арга хэмжээ болох юм байна.  Түүнчлэн цэвэр зөгийн балыг хэрхэн таних аргыг тайлбарлан, өвөлжин хадгалсан сархиатай зөгийн бал задалж үзүүлэх аж.

“Монголын зөгийчдийн нийгэмлэг”-ийн гүйцэтгэх захирал Т.Туяа “Зөгийн балын хэрэглээ огцом нэмэгдэж байгаа бөгөөд Монголд жилд 180-200 тонн зөгийн бал үйлдвэрлэж байна. Харин  270-300 тонн зөгийн бал экспортолдог. Шингэрүүлсэн, сироп хэлбэрийн 3000 тонн шингэн зөгийн бал хэлбэрээр хилээр орж ирж байгаа нь аюул дэлдэж байна. 2015 оны судалгаагаар зөгийн бал хэрэглэгчдийн тоо нэмэгдсэн. Гэвч  хуурамч зөгийн бал хэрэглэж байгаа. Тиймээс уулзалтын үеэр цэвэр зөгийн балыг хэрхэн таних аргыг тайлбарлана” гэлээ .

Монголын зөгийн балыг үнэ цэнэтэй болгох, экспортыг нэмэгдүүлэхэд гарал үүслийг тодорхой болгох, лабораторийн шинжилгээнд хамруулах шаардлагатай байгаа  юм байна. Уулзалтаар энэ асуудлыг хэрхэн шийдвэрлэх талаар ярилцах ажээ.

Сонирхуулахад , цэвэр зөгийн балыг байгалийн цэцгийн болон таримал цэцгийнх гэж ангилдаг. Дэлхийд зөгийн балын 99 хувийг таримал цэцгээс хураадаг аж. Харин монгол зөгийн балын 99 хувийг байгалийн цэцгээс хураадаг ажээ.

Р.Ренчиндулам