Гарт баригдаж, бодитоор оршихгүй хэрнээ үнэ нь өссөөр байгаа цахим мөнгөний нэг хэлбэр биткойныг олборлож ашиг олоход өндөр хүчин чадалтай компьютерээр математикийн тооцоо хийж, их цахилгаан зарцуулах шаардлагатай болдог аж.

Биткойны үйлчилгээ эрхэлдэг гэх компани нийслэлийн Хан-Уул дүүргийн IV хорооны “Viva city” хотхоны N4 байрны хонгилд байрлан ажиллаж байна. Тус компани нь цахилгааны төлбөрөө тухайн байрны оршин суугчдын цахилгааны төлбөрт шингээн хохироож байна гэх мэдээллээр албаны хүмүүстэй нь уулзаж яриа авах гэсэн боловч тайлбар өгөхөөс татгалзсан юм.

Харин тус хотхоны оршин суугчдын ярьснаар өнгөрсөн оны есдүгээр сараас цахилгааны төлбөр нь сар тутамд өмнө төлж ирсэн төлбөрөөс 5000-15000 мянган төгрөгөөр нэмэгдэх болжээ.

Энэ тухай

“Viva city” хотхоны N4 байрны дөрвөн давхрын 4 тоотод амьдардаг Ш.Баатар “2012 оноос хойш амьдарч байна. Гэвч энэ оны есдүгээр сараас цахилгааны төлбөр 10.000 төгрөгөөр нэмэгдэж гарах болсон. Биткойн гэх зүйлийг үйлдвэрлэдэг компани манай байрны хонгилд байдгийг мэднэ. Хоёр жилийн өмнө байрны Сууц өмчлөгчдийн холбооны хүн “Танайхаас доошоо хонгил руу цахилгааны утас татан авч болох уу?. Цахилгааны төлбөрт ямар ч өөрчлөлт гарахгүй” гэж байсан хэмээн ярилаа.

Мөн зэргэлдээх айлын Б.Байгаль “Энэ байранд дөрөв дэх жилдээ амьдарч байна. Сүүлийн саруудад цахилгааны төлбөр 8000-12000 төгрөгөөр нэмэгдэх болсон. Өдрийн цагаар цахилгаан хэлбэлзэх зэрэг асуудал үе үе гардаг. Байрны оршин суугчдаас биткойн үйлдвэрлэдэг компаниас болоод төлбөр нэмэгдэж гараад байна гэх яриа сонссон. Би үүнтэй санал нийлж байна. Яагаад гэвэл цахилгааны өртөг нэмэгдэнэ үү гэхээс хасагдахаа байсан” гэлээ.

Харин Д.Баярмаа нь “Манайх өнгөрсөн жилийн өдийд “Viva city” хотхоны N4 байрны гурван давхрын 5 тоотод нүүж ирсэн. Өмнө нь цахилгааны төлбөр 43000-50000 төгрөгийн хооронд гардаг байсан бол энэ оны есдүгээр сарын сүүлээс 5000-8000 төгрөгөөр нэмэгдэн 60000 төгрөг орчим гарах болсон. Манай байрны хонгилд биткойн үйлдвэрлэдэг компани үйл ажиллагаа явуулдаг болсноос хойш цахилгааны үнэ мэдэгдэхүйц нэмэгдэх болсон” гэж ярьсан юм.

С.Баасандулам