Засгийн газрын хуралдаан  хоёрдугаар сарын 22-ны өдөр болсон. Энэ  хуралдаанаар Нийслэлийн төр, захиргааны болон харьяа байгууллагуудыг Яармаг орчимд шилжүүлэх талаар хэлэлцсэн байна. Тодруулбал,  НИТХ, Засаг даргын Тамгын газар, Захирагчийн ажлын алба,түүний харьяа  байгууллагуудыг Хан-Уул дүүргийн дөрөв болон наймдугаар  хорооны нутаг дэвсгэр /Яармаг шинэ төв/-т шилжүүлэн байршуулах бэлтгэлээ шуурхай хянаж ажиллахыг Нийслэлийн Засаг  дарга бөгөөд Улаанбаатар хотын захирагчид  даалгажээ.

Нийслэлийн төр, захиргааны байгууллагуудад 1933 хүн ажилладаг бөгөөд өдөрт дунджаар 5700 иргэн, аж ахуй нэгжид 332 нэр төрлийн үйлчилгээ үзүүлдэг байна. Яармагт  шилжүүлснээр үйлчилгээ авах  гэсэн дээрх хэдэн мянган хүн хотын төвийг зорих шаардлагагүй болох юм.

Энэ нь хотын төвийн хэт төвлөрөл, автомашины түгжрэл, агаарын  бохирдлыг бууруулахаас гадна хотын хөгжлийн ерөнхий төлөвлөгөөг хэрэгжүүлж эхлэх, бизнесийн таатай орчин бүрдүүлэх, аялал жуулчлалын шинэ төв байгуулах, иргэдэд нутгийн захиргааны үзүүлэх үйлчилгээний хүртээмжийг сайжруулах зэрэг зорилготой юм байна.

Б.Хулан