УИХ-ын дэд дарга Г.Батхүү  Монгол Улсад ажлын айлчлал хийж байгаа БНСУ-ын Төв банкны ерөнхийлөгч Чонсу Кимийг өнөөдөр Төрийн ордонд хүлээн авч уулзлаа.

Монгол Улс, БНСУ-ын  эдийн засгийн хамтын ажиллагааг өргөжүүлэх, хоёр орны төв банкуудын харилцан хамтын ажиллагааг хөгжүүлэх зорилгоор Монгол банк, БНСУ-ын Төв банк хоорондын хамтын ажиллагааны  гэрээнд гарын үсэг зурсан явдлыг  УИХ-ын дэд дарга Г.Батхүү сайшааж, цаашдын ажиллагаанд нь  амжилт хүссэн юм.

УИХ-ын дэд дарга Г.Батхүү, хоёр орны  төв банкуудын хамтын ажиллагааг улам өргөжүүлэх, улмаар Солонгосын Tөв банкны дэмжлэгтэйгээр Монголын банкны салбарын мэргэжилтнүүдийг сургах, давтан сургах, мэргэшил дээшлүүлэх, богино хугацааны сургалтуудад хамруулах нь чухал  байгааг уулзалтын үеэр  хэлж байлаа. Тэрээр, хоёр талын  төв банкуудын харилцаа улам идэвхжиж, харилцан ашигтай хамтын ажиллагааг хөгжүүлнэ гэдэгт найдаж  буйгаа мөн  хэлсэн юм.
 
БНСУ-ын Төв банкны ерөнхийлөгч, ноён  Чонсу Ким,  Монгол Улс эдийн засгийн хөгжлийнхөө онцлог үед ирээд байгааг дурдаж, үүнийг  Монгол Улс  амжилттай даван туулж чадна гэдэгт итгэл төгс  байна гэдгээ илэрхийлсэн. 

Түүнчлэн, Монгол банктай хамтын ажиллагаагаа улам хөгжүүлэхийн төлөө ажиллах болно гэдгээ тэрээр хэлж, тус банкны боловсон хүчнийг бэлтгэх, мэргэжилтнүүдийг нь давтан сургахад анхаарч ажиллана гэдгээ ч илэрхийлж байсан.

УИХ-ын дэд дарга Г.Батхүү, ноён Төв банкны ерөнхийлөгчийн энэхүү айлчлал нь БНСУ-ын эрхэмсэг Ерөнхийлөгчийн Монгол Улсад хийх албан ёсны дээд хэмжээний айлчлалын өмнө болж байгаа нь ихээхэн ач холбогдолтойн зэрэгцээ хоёр улсын эдийн засаг болон гадаад худалдааны эргэлтийг нэмэгдүүлэх, банкууд хоорондын харилцааг шинэ түвшинд гарган ажиллахад дөхөм болно гэдэгт  найдаж буйгаа илэрхийллээ.