ӨНӨӨДӨР ХОЁРДУГААР САРЫН 21

Монгол Улсын хүн амын тоо: 3,190,761

Олон улсын эх хэлний өдөр. ЮНЕСКО жил бүрийн хоёрдугаар сарын 21-ний өдрийг Олон улсын эх хэлний өдөр хэмээн зарлажээ. Эх хэлээрээ ярьж, эх бичгээрээ бичих гэж тэмцээд амь насаа алдсан бэнгаал залуусын дурсгалд зориулан чухам энэ өдрийг сонгосон юм. 1952 оны хоёрдугаар сарын 21-ний өдөр тухайн үед Пакистаны эзэрхийлэл дор байсан Зүүн Бэнгаал буюу өнөөгийн Бангладешийн Дакагийн их сургуулийн оюутан залуус, багш нар эсэргүүцлийн жагсаал хийжээ.

Албан ёсны цорын ганц хэлээр урду хэлийг сонгосон Пакистаны эрх баригчдын шийдвэрийг эсэргүүцэн, бэнгаал хэлт оюутан залуус хэвлэл мэдээллийг бэнгаал хэлээр гаргадаг болох, мөнгөн тэмдэгт бусад албан ёсны бичиг баримт дээр уугуул бэнгаал бичгээр бичдэг болох, ерөөс бэнгаал хүн бэнгаал хэлээрээ чөлөөтэй сайхан ярьдаг байх гэсэн шаардлагыг тавин жагссан байна. Пакистаны цагдаа жагсаалыг хүчээр тараахдаа галт зэвсэг хэрэглэснээр Абдус Салам, Рафик Ахмэд тэргүүтэй олон сайхан оюутан залуу эх хэл, бичгийнхээ төлөө амь насаа алдсан юм. Өдгөө тэр газар хөшөө босгосон байдаг. 

ХОТЫН ЦАГ АГААР

Үүлшинэ. Шөнөдөө цас орохгүй, өдөртөө ялимгүй цас орно. Салхи баруун хойноос секундэд 6-11 метр. Шөнөдөө Яармаг-Сонгины орчмоор 29-31 градус, бусад хэсгээр 22-24 градус, өдөртөө 11-13 градус хүйтэн байна.

ЭНЭ ӨДӨР МОНГОЛЫН ТҮҮХЭНД

1930.02.21 МАХН-ын VIII их хурал хуралдав. Хуралд 201 төлөөлөгч оролцжээ.

1930.02.21 МАХН-ын VIII Их хурал хуралдав. 201 төлөөлөгч оролцсон тус их хурлаар улс орны бүтээн байгуулалтын талаархи намын бодлогыг гүнзгийрүүлсэн заалтуудыг өгч, энэхүү бодлого, шугамын асуудал дээр “Зүүний” нугалааг лавшруулсан зарим “ноцтой” алдааг засч, дүгнэлт хийв. Улсын дотоодын улс төрийн янз бүрийн нугалаа завхралд дургүйцсэний улмаас хил орчмын олон айл өрх хил даван нүүж, дүрвэх явдал газар авчээ. Дүрвэлтэд бүрэн бус мэдээгээр 7542 өрх буюу 30.000 орчим хүн хамрагдсан байна.

2014.02.21 Засгийн газрын хуралдаанаар Иргэний нисэхийн ерөнхий газрын С.Буяндалайг үүрэгт ажлаас нь чөлөөлж, түүний оронд Тогтохбаярын Лхагвасүрэнг томилов.

ӨНӨӨДӨР БОЛОХ ҮЙЛ ЯВДАЛ

09.00

• Энэ оны анхны IPO-г гаргаж буй ЛэндМН хувьцааны захиалгыг авч эхлэх бөгөөд Хөрөнгийн бирж нээлт хийж, 09.00 цагт цан цохино. Монголын анхны финтек компанийн IPO, Монголд гадаадын мэргэжлийн компани анхдагч зах зээлээс хувьцаа худалдан авч буй анхны үйл явдал болж буй нь манай улсад ихээхэн ач холбогдолтой.

11.00

• Монгол Улсын Үндэсний номын сангийн сан хөмрөгт буй 35,000 гаруй баринтаггүй болон хэт хуучирсан баринтаг нь хадгалалтын горимд нийцэхгүй болсон соёлын үнэт өв болсон ном судруудад НОМЫН БАРИНТАГ хандивлах ээлжит өдөрлөг Монгол Улсын Үндэсний номын санд болно.

11.30

• ‘Зууны мэдээ’ сонины Үндэсний мэдээллийн төвд “Завхан нутаг жаргалын орон” шашин соёлын цэнгүүнээр дамжуулан Отгонтэнгэр хайрхан болон байгаль орчныг хамгаалах үйлсэд олон нийтийг уриалан дуудаж байгаа талаараа “Отгонтэнгэр хөгжил” сангаас хэвлэлийн бага хурал зарлалаа.