“Пёнчан 2018” өвлийн олимпийн XXIII наадмын уран гулгалт багийн төрлөөр эхэлсэн. Энэ төрөлд эрэгтэй, эмэгтэй ганцаарчилсан болон хос, холимог хосын үзүүлбэр багтдаг.

Энэ төрөлд 10 орон оролцсоноос өнөөдөр болсон эмэгтэй ганцаарчилсан, бүжгийн хосын богино болон хосын чөлөөт үзүүлбэрийн дараа таван орон хасагдлаа. БНХАУ, Герман, Израйль, Франц болон БНСУ цааш өрсөлдөх боломжгүй болж байна. Учир нь эдгээр орны тамирчид урьдчилсан таван үзүүлбэрээс  20 хүртэлх оноог авч чадаагүй юм.

Одоогоор уран гулгалтын багийн төрлийг Канад 45 оноогоор тэргүүлж байгаа бол Оросын олимпийн баг 39 оноогоор удаалж, АНУ 36, Итали 35, Япон 32 оноотой болжээ.

Маргааш сүүлийн үзүүлбэр эрэгтэй, эмэгтэй ганцаарчилсан болон мөсний бүжгийн чөлөөт үзүүлбэр болж, медальтнууд тодорно.

 Өнөөдөр болсон мөсний бүжиг болон эмэгтэй ганцаарчилсан богино үзүүлбэрийн бичлэгийг ЭНД-с сонирхоно уу.