“Пёнчан-2018” өвлийн олимпийн шайбтай хоккейн гол фаворит бол Оросын шигшээ баг. Энэ удаагийн наадамд Хойд Америкийн Үндэсний хоккейн лигийн тамирчид оролцохгүй нь Оросуудын түрүүлэх боломжийг өндөр болгож байгаа. Иймд Канад болон АНУ-аас өмнөх олимпийн шигшээ багуудаа бодвол харьцангуй сул баг ирэх магадлалтай. Оросын шигшээ баг Тивийн хоккейн лигээс багаа бүрдүүлээд байгаа. Багийн бүрэлдэхүүний 50 гаруй хувийг Санкт-Петербург хотын “СКА” багийн тоглогчдоор бүрдүүлжээ. Мөн Москвагийн “ЦСКА” багаас найм, Магнитогорск хотын “Металлург” багаас ахлагч С.Мозякин болон хаалгач В.Кошечкин нар багтсан байна.

Оросын шигшээ багийн дасгалжуулагч О.Знарок өөрөө Тивийн хоккейн лигт өнгөрсөн улирлын лигийн аварга СКА багийг удирддаг. Иймд өөрийн багаас шигшээ багийнхаа гол цөмийг бүрдүүлжээ. Гарааны тавд "СКА" багийн тоглогчид гарах магадлал өндөр байна. Учир нь олимпийн өмнөх нөхөрсөг тоглолтуудад Оросын шигшээ баг довтолгооны шугамандаа "СКА"-гийн П.Дацюк, И.Ковальчук, В.Шипачев нарыг, хамгаалалтын хослолоор А.Зуб болон В.Войнов нарыг олон минут тоглуулж байсан юм.

ОХУ-ЫН ХОККЕЙН ШИГШЭЭ БАГИЙН БҮРЭЛДЭХҮҮН
 

Хаалгач:

• Василий Кошечкин (Металлург), Илья Сорокин (ЦСКА), Игорь Шестёркин (СКА)

Хамгаалагч:

• Бячеслав Войнов (СКА), Владислав Гавриков (СКА), Артем Зуб (СКА), Андрей Зубарев (СКА), Богдан Киселевич (ЦСКА), Алексей Марченко (ЦСКА), Никита Нестеров (ЦСКА), Динар Хафизуллин (СКА)

Довтлогч:

• Сергей Андронов (ЦСКА), Александр Барабанов (СКА), Михайл Григоренко (ЦСКА), Никита Гусев (СКА), Павел Дацюк (СКА), Илья Каблуков (СКА), Сергей Калинин (СКА), Кирилл Капризов (ЦСКА), Илья Ковальчук (СКА), Сергей Мозязин (Металлург), Николай Прохоркин (СКА), Иван Телегин (ЦСКА), Вадим Шипачев (СКА), Сергей Широков (СКА)

"Пёнчан 2018" өвлийн олимпийн шайбтай хоккейн тэмцээн энэ сарын 10-нд буюу  бямба гаригт эхэлж, олимпийн хаалт болох хоёрдугаар сарын 25-ны өдөр дуусна. 

Б.БЯМБАБАЯР