Эрүүл мэндийн яамнаас өнгөрсөн оны арванхоёрдугаар сард анхан шатны тусламж үйлчилгээг эрчимжүүлэх зорилгоор Монгол Улсад үйл ажиллагаа явуулж байгаа бүх өрхийн эрүүл мэндийн төвд тус бүр 8 сая 50 мянган төгрөгний санхүүжилт олгосон.

Ингэснээр, эмнэлгийн байгууллагууд улсын төсөв болон үйл ажиллагааны орлогоо бие даан захиран зарцуулах боломжийг бүрдүүлээд байгаа ба цаашид өрхийн эрүүл мэндийн төвүүд өдрийн эмчилгээ хийх, гэрээр явж эмнэлгийн тусламж үйлчилгээ үзүүлэн энэхүү үйл ажиллагааныхаа зардлыг эрүүл мэндийн даатгалын сангаас авах боломжтой болж байгаа аж. мТэгвэл Дорноговь аймгийн өрхийн эрүүл мэндийн төвүүд дээрхи санхжүүжилтээ маш үр дүнтэй зарцуулж, энэ оны нэгдүгээр сараас эхлэн  зорилтот бүлгийн эмэгтэйчүүдийг халдварт бус өвчний хөх умайн өмөнгийн эрт илрүүлэгт  хамруулан ажиллаж байна.

Өрхийн эрүүл мэндийн төвийн тусламж үйлчилгээг сайжруулах зорилгоор 8 сая 50 мянган төгрөг олгосон нь хөдөө орон нутагт үр дүнгээ өгч буйг Эрүүл мэндийн сайд Д.Сарангэрэл Дорноговь аймгийн Агатова өрхийн эрүүл мэндийн төвд ажиллах үеэрээ  онцолоод , цаашид иргэдэд үзүүлэх тусламж үйлчилгээг сайжруулан ажиллахыг захилаа.  Түүнчлэн энэ жил Улсын хэмжээний 218 өрхийн эрүүл мэндийн төвд Эрүүл мэндийг дэмжих сангаас 2,5 тэрбум төгрөгийг нийгмийн эрүүл мэндийн тусламж, үйлчилгээ, сургалт сурталчилгаа хийхэд зориулж тэгш хуваарилсан байгаа. Энэ мэт эмнэлгийн анхан шатны тусламж үйлчилгээг бэхжүүлэх чиглэлд олон арга хэмжээг авч хэрэгжүүлнэ гэдгээ салбарын сайд онцоллоо.

Эх сурвалж: Эрүүл мэндийн яам