Хан-Уул дүүргийн Цагаан хаалганаас урагш буюу арьс ширний үйлдвэрүүдийн хажууд нийслэлийн өмчит “Харгиа” цэвэрлэх байгууламж үйл ажиллагаагаа явуулдаг. Нийслэлийн иргэдийг эвгүй үнэрээр угтдаг уг цэвэрлэх байгууламжийг хотоос зайдуу нүүлгэх талаар өнгөрсөн жилээс яригдаж эхэлсэн юм. Тодруулбал, хотоос 50 гаруй километрийн зайд байх Хурганы сангийн аж ахуй байсан газарт цэвэрлэх байгууламжийг барихаар газрын зөвшөөрлийг нь авсан байгаа. Тэгвэл нийслэлийн өмчит Урьдчилан цэвэрлэх байгууламжийн дэд дарга, ерөнхий менежер З.Занданпүрэвийн хэлснээр уг байгууллагыг нүүлгэх ажил хоёр жилийн хугацаанд  үргэлжлэх бололтой. Нийслэлийн Засаг даргын тамгын газраас шинээр төв цэвэрлэх үйлдвэр барих гадаадын компаниудын дунд тендер зарласан байгаа бөгөөд ирэх арваннэгдүгээр сард нэг компанийг шалгаруулж, төсөв, мөнгө, зураг төслийг нь батлахаар болжээ. Иймээс Хан-Уул дүүрэгт үйл ажиллагаа явуулж байгаа арьсны үйлдвэрүүдийг тийшээ нүүхийг анхааруулсан мэдэгдлийг тус бүрд нь хүргүүлээд байгаа аж.