Азийн аваргын рингэнд эхний тулаандаа Японы боксчин Юүта Жүкүмориг 22:6 харьцаатай төвөггүй буулган авсан тэрбээр хүрэл медалийн төлөөх тулаанд Казахстаны Алмасбек Алибековыг 18:11 харьцаатай, улмаар өчигдөр Энэтхэгийн тамирчин Балвиндер Бенвалыг 22:13 харьцаагаар илүүрхсэнээр мөнгөн медалийн болзол хангаад байсан юм. Ийнхүү дэлхийн аваргын хүрэл медальт, Зүүн Азийн наадмын аварга, Азийн наадмын мөнгөн медальт, Азийн аваргын хүрэл медальт, Монгол Улсын Гавьяат тамирчин У.Мөнх-Эрдэнэ Азийн аваргын алтан медаль шагналын цуглуулгадаа нэмлээ.
64 кг-ын жингийн медальтнуудад Монголын олимпийн боксын холбооны
ерөнхийлөгч, Азийн боксын холбооны дэд ерөнхийлөгч Ч.Ганзориг шагналыг
нь гардуулсан бөгөөд У.Мөнх-Эрдэнэ гавьяат ийнхүү холбооныхоо ерөнхийлөгчөөс тивийн аваргын
алтан медалийг зүүж, Инчёны тэнгэрт төрийн дууллаа эгшиглүүллээ.
Харин 56 кг-ын жинд тулалдсан Д.Отгондалай мөнгөн медаль хүртсэн. Тэрбээр эхний тулаандаа Японы тамирчин Шохей Журакүг 24:5 харьцаатай илт
давуу буулган авч, улмаар Киргизстаны тамирчин Медер Мамакеевийг
18:16-гаар ялснаар хүрэл, БНСУ-ын И Жин Ёнг 12:9 харьцаагаар буулган
авснаар мөнгөн медалийн болзол хангасан юм. Харамсалтай нь, шийдвэрлэх тулаанд Тажикистаны боксчин Анвар Юнусовт 13:10 харьцаатай ялагдсанаар медалийн өнгөө хувиргаж чадсангүй.
Мөн Иорданы боксчин Мохаммад Алассиг 25:13 харьцаатай ялж, гараагаа амжилттай хийсэн Т.Чулуунтөмөр хүрэл медалийн төлөөх тулаанд Киргизстаны тамирчин Нурсултан Осмоновыг 25:11-ээр, мөнгөн медалийн төлөө Туркменистаны Нурсахат Паззиевийг 16:11 харьцаатай буулган авсан юм. Харин финалын төлөөх тоглолтод Узбекистаны Шухроз Абдуллоевтай тоглож, 20:9 харьцаатай ялагдсанаар мөнгөн медаль хүртлээ.
Түүнчлэн 69 кг-ын жинд Б.Түвшинбат өчигдөр болсон хагас шигшээ тулаанд ялагдсанаар хүрэл медаль хүртсэн билээ.
Ийнхүү Монголын баг тамирчид П.Сэрдамба /49 кг/, Н.Төгсцогт /52 кг/, Д.Отгондалай /56 кг/, З.Энхзориг /60 кг/, У.Мөнх-Эрдэнэ /64 кг/, Б.Түвшинбат /69 кг/, Т.Чулуунтөмөр /75 кг/, Х.Мандахбаяр /-91 кг/ нарын найман тамирчны бүрэлдэхүүнтэй Азийн аварга шалгаруулах тэмцээнд оролцсоноос нэг алт, хоёр мөнгө, нэг хүрэл медаль хүртсэн амжилттайгаар энэ жилийн тивийн аваргыг өндөрлүүлж байна.
Гэрэл зургийг ЭНД дарж үзнэ үү.