Украйны нийслэл Киев хотноо жүдо бөхийн өсвөрийн дэлхийн аварга шалгаруулах хоёр дахь удаагийн тэмцээн өчигдөр эхэллээ. Дэлхийн 55 орны 570 өсвөрийн тамирчин эрэгтэй, эмэгтэй тус бүр найман жингийн ангилалд дэлхийн аваргын татамид хүч сорихоор Киевт цуглаад байна. Тэдгээрийн дунд Монголын эрэгтэй 13, эмэгтэй 13 тамирчин бий.

Тэмцээн өчигдөр эрэгтэйчүүдийн 50, 55 кг, эмэгтэйчүүдийн 40, 44 кг-ын жингийн барилдаанаар эхэлж, медалийн эзэд тодорчээ. Энэ өдөр Монголын зургаан жүдоч барилдсанаас эрэгтэйчүүдийн 50 кг-ын жинд Б.Мөнхчулуун долдугаар байрт шалгарсан амжилттай эхний өдрийг өндөрлүүлсэн байна. Харин өнөөдөр эрэгтэйчүүдийн 60, 66 кг, эмэгтэйчүүдийн 48, 52 кг-ын жингийн барилдаан болно. Эдгээр жинд Монголын багаас Б.Мөнгөншагай /60 кг/, Г.Балданлхүндэв /60 кг/, Б.Мөнх-Алдар /66 кг/, Г.Алтанбагана /66 кг/, Э.Базаррагчаа /48 кг/, Ц.Хулан /48 кг/, Э.Гэрэлмаа /52 кг/, Х.Золжаргал /52 кг/ нарын найман өсвөрийн жүдоч барилдана.
Өсвөрийн ДАШТ энэ сарын 14-нд өндөрлөнө.