Британийн зохиолч Майкл Уолтерсийн “Сүүдрээр алхагч” роман “Интерном” номын дэлгүүрийн өнгөрсөн долоо хоногт борлуулалтаараа тэргүүлсэн бэстселлэр номын жагсаалтад бичигдлээ. “Энэ бол нэн сонирхолтой роман” хэмээн “The Independent” сонинд онцлон бичсэн уг зохиол Монголын нутагт болж буй ээдрээт хэргийн тухай өгүүлдэг бөгөөд гол дүр болох мөрдөн байцаагч Нэргүй адал явдалт зохиолд дуртай барууны уншигчдад танил дүр хэдийнэ болжээ.

“Баялаг гэдэг хэмжээтэй. Гэсэн ч яг одоохондоо дуусахгүй мэт санагдах арвин нөөцтэй нутагт урьд хожид авч байгаагүй их алт олборлож, үүнээс ашиг, хувь хүртэхээр хошуурцгааж байна” гэсэн мөрүүд уг номд бий. Зохиолчийн сэтгэлд манай орон ийнхүү буужээ. Монгол орныг зурагласан түүний дүрслэл цааш ““Бид коммунист байсан. Гэвч итгэл үнэмшлээ хэзээ ч алдаж байгаагүй. Буддизмыг нухчин дарсан, гэхдээ хэзээ ч устаж алга болоогүй. Одоо хэзээ хэзээнээс хүчтэй болон сэргэж байна. Хүн амын маань бараг тал хувь нь нүүдэлчин малчны амьдралаараа амьдарч байгаа. Хот хүрээнд оршин суудаг зарим нэг нь ч тийм эрх чөлөөт амьдралын хэв маягийг мөрөөдсөөр. Гэтэл барууны нөлөө тун эрчтэй орж ирж байна. Гоё ганган зочид буудал барьж, гадаадын хөрөнгө оруулалтын урсгал эхэлсэн. Гэхдээ л бид айргаа уусан хэвээр” гэх гол дүрийн баатрын үгээр үргэлжилнэ.

Энэхүү романыг сэтгүүлч, орчуулагч Б.Цацрал орчуулан хэвлүүлжээ. 2006 онд бичигдсэн “Сүүдрээр алхагч” роман зохиолч Майкл Уолтерсийн адал явдалт цувралын эхнийх нь бөгөөд тун саяхан дөрөв дэх шинэ цувралаа Европын номын зах зээлд гаргаад байна.

“Сүүдрээр алхагч” номыг “Интерном”, “Мир”, “Билиг”, Улсын их дэлгүүрийн “Мажестик” номын дэлгүүрүүдээр борлуулж байна. 1617 болон suudreeralkhagch@yahoo.com хаягаар номын захиалга өгч болох бөгөөд үнэгүй хүргэж өгнө.