УИХ-ын гишүүн, Өргөдлийн байнгын хорооны дарга М.Оюунчимэг өнөөдөр /2018.01.10/ мэдээлэл хийлээ.

Өргөдлийн байнгын хороонд ирсэн өргөдөл, гомдлуудын талаар мэдээлэл өгсөн юм. Тус байнгын хороонд өнөөдрийн байдлаар нийт 1461 иргэнээс өргөдөл гомдол иржээ.

Он гарснаас хойш Хувь хүний орлогын албан татварын нэмэгдэлтэй холбоотой өргөдөл олон ирж байгааг онцоллоо.  Хууль батлахын өмнө судалж үзэхэд нийт хүн амын найман хувьд нөлөө үзүүлнэ хэмээн тооцож байсан бол хууль хэрэгжих явцад 11,7 хувьд нь нөлөөлж буйг тогтоожээ. Иймд энэхүү татварын нэмэгдлийг эргэж харах нь зүйтэй хэмээн үзэж, Байнгын хорооноос Засгийн газарт хандсан байна. Түүнчлэн Татварын ерөнхий хуулийг татвар нэмэх бус замаар өөрчлөх цаг нь болсон байна хэмээн үзсэний зэрэгцээ УИХ-д Байнгын хорооноос энэ талаарх саналаа хүргүүлэх аж.

Тус байнгын хороонд мөн БНСУ-д суух Элчин сайдаар томилогдсон Б.Хурцтай холбоотой асуудлаар 10 иргэн гомдол гаргасан өргөдөл ирүүлжээ.

Өргөдөлтэй холбогдуулж Байнгын хорооноос Ерөнхий прокурорт хандсан бөгөөд ‘Ямар хариу ирсэн талаар эргэж мэдээлнэ’ гэж Байнгын хорооны дарга М.Оюунчимэг онцоллоо.

Утааг бууруулах чиглэлд төсөвлөсөн хөрөнгийг үр дүнтэй, зориулалтын дагуу зарцуулж байгаа эсэхэд тэдний зүгээс анхаарал хандуулж ажиллаж байгаа аж. ‘Өнгөрсөн жилүүдэд утаа бууруулахад улсаас ихээхэн хэмжээний хөрөнгө мөнгө төсөвлөж байсан ч шамшигдуулалт их байсан тул эл асуудлыг шалгуулж, буруутай этгээдүүдээр нөхөн төлүүлэх асуудлыг гаргаж тавьж байгаа’ гэлээ.

Ш.ЧИМЭГ