Шатар сонирхогчдын улсын аваргууд тодорно

Шатар сонирхогчдын 2018 оны Улсын аварга шалгаруулах тэмцээн өнөөдөр Төрийн ордонд өндөрлөнө. Монгол Улсын Үндсэн хууль батлагдсан өдөрт зориулсан УИХ-ын даргын ивээл дор зохион байгуулдаг уг тэмцээн өчигдөр нээлтээ хийсэн юм.

Монголын шатрын холбоо, УИХ-ын Тамгын газартай хамтран энэхүү тэмцээнийг зургаа дахь жилдээ зохион байгуулж байна.

Шигшээ тэмцээнд эрэгтэй 90, эмэгтэй 30 шатарчин өрсөлдөж байгаа бөгөөд өнөөдөр медальт байранд шалгарсан шатарчид тодорно. Шатар сонирхогчдын улсын аварга шалгаруулах тэмцээний хамгийн ахмад нь улсын шүүгч, спортын мастер Ц.Цэрэнчимэд бөгөөд тэрбээр энэ жил 85 настайдаа оролцож байна. Мөн хамгийн залуу тамирчин Дорноговь аймгийн оролцогч Б.Анхбаяр юм.

Уг тэмцээнд Монголын шатрын холбооноос гаргасан чансааны жагсаалтаар сүүлийн хоёр жилийн хугацаанд чансаа нь 2000-аас доошгүй, шатрын спортын цолгүй, мөн 18-аас дээш насны шатар сонирхогчид оролцдог. Тэмцээний анхан шат 2017 оны арваннэгдүгээр сарын 18-ны өдөр улс орон даяар болж, шалгарсан шатарчид аймаг, нийслэлийн аварга шалгаруулах тэмцээнд оролцсоноор шигшээ тэмцээнд өрсөлдөх эрхээ авчээ.

Шатар сонирхогчдын улсын аваргын урьдчилсан шатанд оролцох сонирхогчдын тоо жилээс жилд өсөж байна. Тодруулбал, тус тэмцээнд 6700 гаруй шатарчин оролцсон гэсэн мэдээллийг Монголын шатрын холбооноос гаргасан байна. Энэ жилийн анхан шатны тэмцээнд Увс аймагт 625, Баянхонгорт 459, Өвөрхангайд 437 шатарчин оролцсон нь шатрын спортын хөгжил орон нутагт ямар түвшинд хүрснийг харуулж байгаа юм.

Шатар сонирхогчдын улсын аварга шалгаруулах тэмцээн 2013 оноос эхлэн Төрийн ордонд зохиогдож эхэлсэн бөгөөд өнөөдөр отгон аваргууд тодорно.