УИХ-ын чуулганы нэгдсэн хуралдаанаар агаарын бохирдлыг бууруулахтай холбоотой тогтоолыг хэлэлцэж байна. Энэ үеэр Ерөнхийлөгч Х.Баттулга ‘Утааг шийдэж чадахгүй бол УИХ тарахаас аргагүй. Шинэ Засгийн газар байгуулагдсан, ийм асуудлыг шийдэж чадахгүй юм бол яах юм бэ. УИХ-ыг тараах талын асуудлыг сар шинийн дараагаас тавина шүү’ гэсэн юм.  Үүний дараа гишүүд санал, шүүмжлэл хэллээ.

УИХ-ын гишүүн О.Баасанхүү:

-Ерөнхийлөгч сая утааны асуудлыг шийдэхгүй бол УИХ-ыг тараана гэлээ, тийм эрх байхгүй. Популизм хийлээ. Гоё ярьсан нь үнэн байдаггүй, бодитой ярьсан нь үнэн баймаар байна.

Ардчилсан намынхан та нар хангалттай мөнгө идсэн. Нэг гараараа ажил хийгээд нөгөө гараараа хулгай хийгээд явсан биздээ.Утаа 2000 оноос хойш байсан, мөнхийн дарга байх, мөнхийн төрд байх сонирхолтой хүмүүсийг гаргахаа больчихвол утаа арилна.

УИХ дахь МАН-ын бүлгийн дарга Д.Хаянхярваа:

–Ерөнхийлөгч УИХ дээр орж ирээд, шантааж маягийн юм хийгээд гардаг боллоо. Төрийн ордонд агаарын бохирдлыг бууруулахтай холбоотой үзэсгэлэн гарсан. Гэтэл Ерөнхийлөгч “Тэнд юу ч байхгүй, ашиг хонжоо хайсан луйварчид байна” гэж хэлчихээд гараад явлаа. Энэ хүнд таалагдсан хүмүүс иймэрхүү төрлийн бизнес эрхлэх ёстой болж байна уу.

Төрийн хүн төрийн дундуур хутгуур байдлаар орж ирж байгаа нь сайнаар нөлөөлөхгүй. Утаа хэдхэн сарын дотор арилахгүй. Тийм байтал цагаан сар болонгуут утаа арилсангүй гээд төрийн тэргүүн УИХ-ыг тараана гээд гүйх юм байна л даа.

Утаагаар улс төр, шоу хийдгээ боль. Хариуцлага үүрэх ёстой гэвэл УИХ-д удаа дараа сонгогдсон гишүүд, Ерөнхийлөгч, Ерөнхий сайдтайгаа бүгдээрээ огцоръё.

Г.ДАРЬ