Алдарт жүжигчин Мэрлин Монро гол дүрд нь тоглосон гэх ердөө зургаахан минутын порно киноны хальсыг дуудлагаар худалдах гэсэн оролдлого бүтэлгүйтжээ. Өнгөрөгч ням гаригийн үдэш Аргентиний нийслэл Буэнос-Айрест кино үйлдвэрлэлтэй холбоотой ховор нандин эд зүйлсийг худалдах дуудлага худалдаа зохион байгуулсан юм. Тэдгээрийн дундаас Мерилин Монрогийн гэх уг хальсыг худалдан авах хүсэлтэй нэг ч хүн байсангүй. 1940-өөд оны дундуур авсан болов уу хэмээн таамаглаж буй уг кинонд Мерилин Монро кино ертөнц рүү дөнгөж хөл тавьсан 20 гаруйхан настай Норма Жин байх үедээ хэн нэгэнтэй загас наадуулж байгаа дүрс гардаг гэнэ. Энэ бичлэгийг дуудлагаар худалдаж овоо хэдэн “ногоон” олно гэж тооцоолсон Микель Барса анхны үнийг 480 мянган ам.доллараас дуудна хэмээн зөрүүдэлж байжээ. Дуудлага худалдаанаас өмнө уг хальсыг 280 мянгаар авах санал тавихад үл хайхарсандаа тэрбээр одоо амаа барьж буй гэнэ.

Микель Барсад буй уг хальсыг 1997 онд олсон. 2001 онд нэгэн цуглуулагч 1,2 сая ам.доллараар худалдаж авсан гэдэг. Гэхдээ хальсан дээрх бүсгүйг Мерилин Монро мөн гэдэг ч эргэлзээтэй нь энэ удаагийн дуудлага худалдаа бүтэлгүйтэхэд нөлөөлсөн байж болох талтай. Учир нь Мерилин Монрогийн шүтэн бишрэгчид түүний нэртэй эд зүйлд гар татдаггүй юм. Өнгөрсөн жил л гэхэд Монрогийн хөх болон таазны ясны гурван ширхэг рентген зураг 45 мянган ам.долларын үнэ хүрч байсан билээ.