Монголын оюутны сагсан бөмбөгийн лигийн хошой аварга “СИТИ” их сургуулийн “Аянга” баг 2017 онд олон сайхан амжилт үзүүлсэн байна. Тухайлбал, тус баг дөрвөн жил тутам зохион байгуулагддаг Оюутны их наадам буюу Универсиад 2017 наадмын сагсан бөмбөгийн төрөлд мөнгөн медаль, Сүхбаатар дүүргийн Оюутны спортын IV наадмын алтан медаль хүртсэн байна.

СИТИ их сургууль нь оюутнуудаа чөлөөт цагаа зөв боловсон өнгөрүүлж, спортоор хичээллэх боломж, нөхцөлөөр хангахад анхаарч ажиллаж ирсэн бөгөөд энэ оны 09 дүгээр сард олон улсын стандартад нийцсэн шинэ спорт заалаа ашиглалтад оруулжээ. Мөн тус сургуулийн зүгээс аливаа гэмтэл, ослын үед учирч болзошгүй хохирлын хэмжээг бууруулах, эрсдэлээс сэргийлэх зорилгоор сагсан бөмбөгийн шигшээ багийн тамирчдаа даатгалд хамруулсан байна.