Энэтхэгийн нэгэн шинэхэн хос гэрлэхдээ хуримын бэлгэнд цахим мөнгө биткойн авахыг хүсчээ.

Банглор хотод оршин суудаг шинэхэн гэрлэсэн хос цахим бирж нээж байгаа бөгөөд технологийн компанид ажилладаг олон найз нөхдөөсөө хуримын бэлгэнд биткойн авсан аж.

Тэд энэ сарын 9-нд Энэтхэгийн төв банк хөрөнгө оруулагчдад биткойн худалдаж авахгүй байх тухай гурав дахь удаагийн анхааруулгаа гаргаад удаагүй байхад хуримаа хийжээ.

Гэвч төв банкны анхааруулга шинэ хосын ах дүү, хамаатан садан болон найз нөхдийг биткойн авахад саад болоогүй гэнэ. Хуриманд уригдсан 200 гаруй зочдын 15 нь л гэр бүл болсон залуу хосод биткойноос өөр уламжлалт бэлгээ гардуулсан байна. Харин хосууд хуримын бэлгэнд 100,000 рупи буюу 1500 ам.долларын үнэ бүхий биткойн авсан гэнэ.

Сүүлийн үед ханш нь тэнгэрт хадаж буй биткойны үнийн хөөсрөл удахгүй хагарч магадгүй гэсэн болгоомжлол байгаа хэдий ч шинэхэн хос үүнд огт санаа зовохгүй байгаа ажээ.

ЭХ СУРВАЛЖ: BBC