Замаар зөрөлдөн давхих автомашин, энхэл донхол, тогтоол ус, тоос шороо гээд муу бүхнийг тоочвол барагдахгүй их зовлонтой Дарь эхийн зам энэ сарын 7-ноос эхлэн анир чимээгүй.  Хуучин замын хучилтыг хуулах, хашлага цутгах машинаас өөр техник харагдахгүй шахам. Учир нь, энд зам засвар шинэчлэлтийн ажил эхэлж буй нь энэ. Хоёр километр тутамд зам хааж буй учраас автомашин зорчих боломжгүй. Тиймээс хаа байсан Дамбадаржаа, Долоон буудлаар тойрон тэнүүчлэх, эсвэл замын түгжрэлд орж, цаг хугацаа алдахаас төвөгшөөсөн иргэд хотын төвийг чиглэн алхах нь дийлэнх. Ирэх сарын есдүгээр сарын 1-нд нийт замын зорчих хэсгийг ашиглалтад хүлээлгэн өгөхөөр ажиллаж буй тус зам засварынхан Сансарын шатахуун түгээх станцын уулзвараас хоёр километр хүртэлх замыг хааж, засварлаж ажлыг эхлүүлээд байна. Уг хоёр километр замын ажлыг энэ сарын 17-ныг хүртэлх хугацаанд замын хучилт, ус зайлуулах байгууламжийг хийж дуусгана гэсэн төлөвлөгөөтэй ажиллаж байгаа талаар нийслэлийн Засвар арчлалтын хэлтсийн дарга Б.Төрбилэг тайлбарлаж байв. Замын засвар шинэчлэлийн ажлын гүйцэтгэгчээр “НКВ интернэшнл холдинг” ХХК ажиллаж байгаа бөгөөд ажил нь 40 гаруй хувийн гүйцэтгэлтэй байгаа аж. Өчигдөр зам засварын ажлын явцтай нийслэлийн Засаг даргын орлогч Б.Мөнхбаатар газар дээр нь очиж танилцлаа. Энэ сарын 9-ны бага үдийн хэрд хотын удирдлагуудын зочлох үеэр замын хашлага цутгах, хуучин хучилтыг хуулах бутлах, дэвсэх ажлууд их өрнөж байв.

Засаг даргын орлогч Б.Мөнхбаатарын хамгийн эхлээд зам засварын ажил эхэлсэнтэй холбоотойгоор сайн, муу гэх мэтээр яригдаад буй асуудлын нэг нь замын хашлагын ажлыг сонирхов. Дөрвөөс таван хүн Портер маркийн машинаас бетон зуурмагийг хашлага хэвлэх машин руу цутгаснаар шууд л замын хашлага бэлэн, газар дээр нь хэвлээд явах юм билээ. Хамгийн гол нь бетон хашлагыг чийгшлийг нь алдагдуулахгүйгээр хатаах үүднээс гялгар цаасаар хучсан хучилтийг шөнөөр хуулах, хатаагүй байхад нь гишгэж, цөмлөх гээд чанар, стандартыг алдагдуулж буй бэрхшээл байгааг ч энэ үеэр гомдоллож байв. Үүнийг гэрчлэх аятай өөдөөс алхах залуу шинэхэн хэвлэсэн хатаж амжаагүй хашлаган дээр гишгэж орхив.

Замын хашлагыг цутгаж буй технологи нь улсын хэмжээнд анх удаа нэвтрүүлж буй цаг хугацаа хэмнэсэн ач тустай юм гэнэ. Зүгээр л ухаж суулгахгүйгээр газар дээр нь шууд бетон зуурмагаар тусгай машинаар өдөрт 500 метр замын хашлага хэвлээд явах хүчин чадалтай техник технолгийг ашиглаж буй нь сайшаалтай хэдий боловч цаашид цэвдэгшил ихтэй Дарь эхийн замд тохирох эсэхийг цаг хугацаа л харуулах биз. Буруу, зөвийг тунгаах гэсэн ч юм биш. Өнгөрсөн жилийн 100 айлын замын эвдрэлийг газрын онцлогоос шалтгаалсан гэх маягаар эзэн холбогдогчгүй болгоод орхидог шиг л болчихгүй бол яахав гэх оршин суугчид олон таарлаа.

Хашлага цутгаж байгаа хэсэг ажилчдаас цааш яваад хуучин хучилтыг хуулж, бутлан, эргүүлээд дэвсч буй хүчит техникийн дэргэд очлоо. Хуучин хучилт хуулахаас өмнө хуурай цемент дээгүүр нь асгаж, өнөөх техник нь тэр чигт нь хуулж орхих юм. Хуулснаа эргүүлээд өөрөө бутлан, тэр даруйд нь эргүүлээд дэвсэж, тэгшилж орхив. Энэхүү технологи нь ч бас шинээр нэвтрүүлж буй ажлын нэг гэнэ. Урьд нь хуучин хучилтыг хуулж, зөөж холдуулах, шинээр хайрга дэвсэх гээд хөрөнгө, хүч ихээхэн зарцуулдаг байсан бол энэ удаад дээрх технологийг нэвтрүүлснээр хэмнэлт хийх боломжтойгоос гадна чанарын хувьд “ок” юм байх. Энэ технологийг манайхаас бусад оронд зам засварын хамгийн шилдэг технологид тооцдог гэнэ.

Оршин суугчдын хувьд зам засварын ажилтай холбоотойгоор хамгийн хүндрэлтэй асуудал нь автомашины хөдөлгөөний зохицуулалт, нийтийн тээврийн үйлчилгээ. Том оврын автобусууд Сансарын шатахуун түгээх станцын уулзвараас хойш хоёр километрээс цаашхи зайнаас зорчигчдоо суулган, Дамбадаржаа, Долоон буудлаар тойрон, 100 айлаар эргэж, тус тусын чиглэлд зорчих нь завтай, цагтай хүнд бол нэг ёсны аялал, ажил төрөлтэй нэгэнд нь хэцүүхэн байгаа аж. Нөгөөтэйгүүр автомашин хөлөглөгсөд Сэлбэ голыг хөндлөн гулд туучин, 100 айл, 32-ын тойргоор зам товчлох нь ихсэж, Сэлбий сэрээх бус, мөхөөж ч болох байдал тэнд үүсээд байгаа гэнэ. Энэ үеэр оршин суугчид хотын даргын орлогчид гомдол, саналаа хэлж, цаг алдахгүйгээр зам засварын ажлыг чанартай бөгөөд хурдан хийхийг сануулаад амжив. Тэд нэгэнт л улсын хөрөнгийг өчнөөнөөр нь үрэн байж хийж буй замыг чанартай байх үүднээс хаана ус зайлуулах хоолой гаргах, автобусны буудлыг онцлогоос хамааран байршлыг тогтоох гээд оршин суугчилтай харилцан санал солилцох хэрэгтэй гэж байлаа. Мөн хуучин долоон метр замыг ес болгож өргөсгөх ажил учир дутагдалтай, хэмжээндээ хүрэхгүй байгааг ч энэ үеэр холбогдох удирдлагуудад цухалзуулав. Ямартай ч Дар-Эхийн замыг тамын биш зам болгох гэж хичээж байгаад нь баярлах хэрэгтэй ч хэдэн жилийн настай чанартай зам байвал хэн хэндээ сайнсан. Чанаргүй, бүтэлгүйгээр дуу¬дуулж олон хүн бухимдуулж, дараа жил дахин засахгүйн тулд чанар чанар бас дахин чанарыг эрхэмлээсэй замчид маань. Ганц Дарь-эхийн зам ч биш нийслэлд баригдаж буй бүх замыг чанартай хийж гүйцэтгэвэл олон иргэд баярлах биз ээ.