Амьсгалын замын цочмог халдвар ихэсч байгаатай холбогдуулан Эрүүл мэндийн дэд сайд Л.Бямбасүрэн, Нийслэлийн эрүүл мэндийн газрын орлогч дарга О.Баяр болон албаны бусад хүмүүс өчигдөр /2017.12.18/ нийслэлийн Хан-уул, Чингэлтэй, Сүхбаатар дүүргийн нэгдсэн эмнэлгийн хүүхдийн тасагт очиж ажиллалаа.

Энэ сарын 14-ны мэдээллээр, нийслэлийн харьяа эмнэлгүүдийн орны ачаалал 62.9 хувиар буюу 547-оор нэмэгдсэн бөгөөд нийт 869 орон дээр 1416 хүүхэд хэвтэн эмчлүүлж байгаа юм байна. Насанд хүрэгсдийн орны 175 орыг хүүхдийн оронд шилжүүлж, нөөц өрөөнүүдэд 342 ор тавьснаар хүүхдэд зориулж нийт 517 орыг нэмэлтээр гаргажээ. Эрүүл мэндийн дэд сайд Л.Бямбасүрэнгээр ахлуулсан ажлын хэсгийнхний зүгээс өвчтөнүүдэд үзүүлж буй эмчилгээ үйлчилгээний хүртээмж, орны зохицуулалт, эм тарианы хангалт, эмч ажиллагсдын хуваарилалттай танилцаж, хэд хэдэн чиглэлд үүрэг даалгавар өглөө.

Хан-уул, дүүргийн эрүүл мэндийн төвийн хувьд мэдрэл, уламжлалт эмчилгээний насанд хүрэгсдийн тасгийг чөлөөлж хүүхдийн тасаг болгосон байна. Чингэлтэй дүүрэгт мөн адил физик, уламжлалт эмчилгээ, хүүхдийн тоглоом, чийрэгжүүлэлт, эмч нарын болон эм тариа, уулзалтын өрөө зэрэг бүхий л нөөц бололцоогоо ашиглан өвчтөнүүдээ хэвтүүлсэн байна.

Дэд сайд Л.Бямбасүрэн дээрх эмнэлгүүдэд ажиллах үеэрээ “Амьсгалын замын халдварт өвчлөл ихэсч байгаагаас үүдэн дүүргийн нэгдсэн эмнэлгүүдийн ачаалал нэмэгдсэн. Ханиад томууны өвчлөлийн дийлэнх хувийг хүүхдүүд эзэлж байна. Өнөөдөр эмнэлгүүдийн хүүхдийн тасгаар орж үзлээ. Ханиад томууны эхлэл үед хүндрэл нэлээд эрчимжих хандлагатай байгаа нь ажиглагдаж байна. Энэ өвчлөлийн үе шат гуравдугаар сар хүртэл хамгийн их ачаалалтай байдаг.

Эрүүл мэндийн яамны шуурхай удирдлага болон салбарын зүгээс өнөөдрийн нөхцөл байдлын талаарх тодорхой ажлуудыг Нийслэлийн эрүүл мэндийн газартай хамтран хэрэгжүүлж байна. Цаашлаад урьтал үе буюу агаар дуслын замаар дамждаг амьсгалын цочмог халдвар ихэсч байгаатай холбогдуулан удахгүй эхлэх сурагчдын амралтын үеэр үзвэр үйлчилгээ, олон нийтийн газраар бага насны хүүхдүүдээ авч явахгүй байх, амны хаалт тогтмол зүүлгэх, дархлааг нь дэмжих зэрэг өвчнөөс урьдчилан сэргийлж, эцэг эхчүүдийг үр хүүхэддээ тавих анхаарлаа сайжруулахыг хүслээ.

Эх сурвалж: НИЙСЛЭЛИЙН ЭРҮҮЛ МЭНДИЙН ГАЗАР