Монголын хөлбөмбөгийн холбооны оны шилдгүүдийг тодруулах “Алтан бөмбөг” ёслолын үйл ажиллагаа маргааш /2017.12.12/ Шангрила зочид буудалд болно. Оны шилдэг эрэгтэй, эмэгтэй тоглогч, дасгалжуулагч, гадаад тоглогч, бэлгэдлийн 11 тоглогчийг тодруулан, энэхүү ёслолоос зарлах юм. 

Өнөөдөр Монголын хөлбөмбөгийн холбооноос гол номинациудад хамгийн өндөр оноо авсан тоглогчдыг танилцууллаа. Арванхоёрдугаар сарын 1-нд нээгдсэн санал хураалтыг өчигдөр /2017.12.10/ 16.00 цагаас хаажээ. 

Харин эдгээр тоглогчдын хэн нь шилдгийн шилдгээр шалгарсныг ‘Алтан бөмбөг’ ёслолын үеэр тодруулна. 

Монголын хөлбөмбөгийн холбоо шилдгүүдийг тодруулахдаа сөнөл өгөх эрх бүхий дараах хүмүүсээс санал авдаг. Тухайлбал, эрэгтэй номинациудад “Хүрхрээ үндэсний лиг”-ийн 10 багийн дасгалжуулагч, багийн ахлагч, эмэгтэй номинациудад энэ жилээс “Эмэгтэйчүүдийн лиг”-ийн багуудын дасгалжуулагч, багийн ахлагч нар санал өгсөн. Мөн Монголын спортын сэтгүүлчдийн холбооны нэр бүхий 15 сэтгүүлч зөвхөн эрэгтэй номинациудад санал өгч, 2017 оны “Алтан бөмбөг”-ийн эздийг тодруулжээ. SPS сувгийн нэрэмжит “Ганган гоол” номинацийн санал хураалтыг SPS – Premier Sports Channel хуудсаар авсан учир 2017 оны шилдэг гоолд санал өгөх боломж хүн бүрд нээлттэй байжээ. 

‘АЛТАН БӨМБӨГ’-ИЙН НОМИНАЦИУД

• Оны шилдэг эрэгтэй тоглогч
• Оны шилдэг эмэгтэй тоглогч
• Оны шилдэг эрэгтэйчүүдийн багийн дасгалжуулагч
• Оны шилдэг эмэгтэйчүүдийн багийн дасгалжуулагч
• Оны шилдэг гадаад тоглогч
• Оны шилдэг ганган гоол
• Бэлгэдлийн 11
• Оны шилдэг шүүгч
• Ерөнхийлөгчийн нэрэмжит шагнал

Б.ЭНХ