Олон улсын теннисний холбоо /ITF/ энэ оны шилдэг эрэгтэй, эмэгтэй теннисчний нэрийг зарлалаа. 2017 оны шилдэг теннисчинээр Испанийн Рафаэль Надаль, Гарбин Мугуруза нар шалгарсан байна.

31 настай Рафаэль Надаль энэ жил Францын нээлттэй тэмцээн болон Америкийн нээлттэй тэмцээнд түрүүлж, дэлхийн чансааг тэргүүлж эхэлсэн. Түүний хувьд уг нэр хүндтэй шагналыг 2008 онд анх удаа хүртсэн бөгөөд 2010, 2013, 2017 онд хүртээд байна. Оны шилдэг теннисчин шагналыг Швейцарын Рожер Федерер хамгийн олон удаа буюу таван удаа хүртээд байгаа бол Сербийн Новак Жокович, Испанийн Рафаэль Надаль нар дөрвөн удаа хүртжээ.

Тэгвэл эмэгтэй теннисчдийг энэ жилийн “Уимблдон”-д түрүүлсэн амжилтаараа Испанийн Мугуруза хүртлээ. 24 настай Мугуруза оны төгсгөлд чансаагаа хоёр болгож чадсан бөгөөд Румыны Симон Халеп бичигдэж байна.

Тэрбээр “Уимблдон”-ы цомыг өргөхдөө тус тэмцээнийг чансаагаар тэргүүлж байсан Германы А.Керберийг дөрөвдүгээр тойрогт хожиж, финалд АНУ-ын Винус Уильямсыг ялж, аваргалсан юм. Өнгөрсөн онд Францын нээлттэй тэмцээнд түрүүлж байсан Г.Мугуруза энэ жил “Уимблдон”-д өнгөлж, оны шилдэг боллоо. Мөн чансаагаа хоёр болгон ахиулж чадсанаар энэхүү нэр хүндтэй шагналыг анх удаа хүртэж байна.