Нийт 11 улсын 13 баг оролцсон клубийн Дэлхийн цомын тэмцээн Ираны Тегеранд болж, Монгол Улсын залуучуудын шигшээ баг ‘Хийморь’ нэртэйгээр дасгалжуулагч Б.Батзоригийн удирдлага дор хүч үзлээ. Манай бөхчүүд В хэсэгтээ Тажикистаны ‘Tajik Air’ багийг 8:2, Унгарын ‘Budapest SC’ багийг 6:4-өөр ялж шөвгийн дөрөвт шалгарсан байна.

Улмаар хагас шигшээд оддоор бялхсан АНУ-ын ‘Titan Mercury’ багт 1:9, хүрэл медалийн төлөө чанга бөхчүүдтэй Ираны ‘Separegan Sari’-д мөн 1:9-ээр ялагдав. Ийнхүү хамгийн залуу бүрэлдэхүүнтэй хирнээ өндөр зэрэглэлийн тэмцээнд амжилттай оролцож, туршлага хуримтлуулсан тамирчдадаа баяр хүргэе. 

Монголын багийн бөхчүүдээс 65 кг-д өрсөлдсөн Т.Тулга дөрвөн удаа (Үүнээс гуравт нь оноогоор цэвэр) ялж, нэг ч ялагдаагүй бол 57 кг-д Ц.Цогбадрах, 70 кг-д Л.Батбаяр, 79 кг-д Г.Төрболд, 125 кг-д өрсөлдсөн М.Лхагвагэрэл нар тус бүр хоёр ялалт байгуулжээ. 

Б.ЭНХ