МАХН-ын Их хурал дуулиан, шуугиантай өрнөж байна. Тус хуралд оролцохоор  21 аймгийн 700 орчим төлөөлөгч ирсэн боловч 400 гишүүн нь л Төрийн ордон руу орж, бусад нь хуралдаа сууж чадалгүй үлджээ. 

Учир нь УИХ-ын гишүүн асан З.Баянсэлэнгэ болон “оймс” Б.Жагар нарын хүмүүс Төрийн ордны гадаа эсэргүүцэл илэрхийлж, энэ хурлыг хууль бус хэмээн зарлан, гишүүдийн мандатыг хурааж авсан юм.

МАХН-ын дарга Н.Энхбаяр, Ерөнхий нарийн бичгийн дарга Э.Эрдэнэжамьяан, нарийн бичгийн дарга Б.Тулга, намын гишүүн З.Баянсэлэнгэ нар өнөөдрийн зарласан хуралд оролцоогүй бөгөөд тэд маргааш /2017.12.10/ 14.00 цагт гишүүдийн дотоод хурал зарлана гэж мэдэгдээд байна. 

З.Баянсэлэнгэ Их хуралд оролцохоор ирсэн гишүүдийг маргаашийн хуралд очихыг уриалж,  200 орчим гишүүний мандатыг хураан авсан гэж хурал зохион байгуулагчид ярилаа. 

Мандатгүй болсон гишүүд ‘Баянгол’ зочид буудлын гадна цуглажээ.

Харин МАХН-ын дэд дарга С.Ганбаатар энэ хуралд оролцож байгаа юм. Тэрбээр ‘Их хурлыг хүчин төгөлдөр бус, тэр утгаараа намын дарга Н.Энхбаяр оролцоогүй’ гэж ярилаа. Харин

УИХ-ын гишүүн О.Баасанхүү Их хурлыг хууль журмын дагуу зохион байгуулж байгааг тодотгоод, өнөөдрийн хурлаар намын даргын суудлаас Н.Энхбаярыг чөлөөлсөн гэж мэдэгдлээ. 

Т.НОМИН