Монголын оюун ухааны академийн тамирчид болох оюун ухааны Олон улсын их мастер Н.Мөнхшүр, Н.Энхшүр, Э.Лхагвадулам, З.Цэцэгзул нар БНХАУ-ын Шэньжэнь хотод болж буй олон улсын тэмцээнд оролцож байгаа талаар бид мэдээлсэн.  100 мянган ам.долларын шагналын сантай тэмцээн гурван өдөр болж, өчигдөр /2017.12.08/ өндөрлөхөд Монгол Улсын оролцогч Н.Мөнхшүр олон удаагийн гүйцэтгэлийн нийлбэр дүнгээр тэргүүллээ. Тэмцээний дэд байранд Хятадын тамирчин оржээ.

Тэмцээнд 320 тамирчин ой тогтоолт, оюун ухааны дасгалд өрсөлдөж, ялагчаа тодруулжээ. 2017 оны ДАШТ-ий дараа болж байгаараа онцлог болсон тус тэмцээн улам сонирхолтой байж, олон дэлхийн аварга цолтой тамирчид тус тэмцээнд оролцсон юм.

Зохион байгуулагч орны тамирчид 60 мянган оюун ухааны тамирчдаас шигшигдэн оролцсоноос гадна ой тогтоолтын олон дэлхийн аварга цолтон уригджээ.

Монголын оюун ухааны академийн тамирчид сүүлийн жилүүдэд эх орнынхоо нэрийг тив, дэлхийн тэмцээнд өндөрөөр гаргаж байна. Хамгийн сүүлд энэ сарын 1-3-ны хооронд Индонези улсын Жакарта хотод болсон ой тогтоолтын Дэлхийн аварга шалгаруулах тэмцээнд амжилттай оролцож, багийн дүнгээр тэргүүлсэн. Тус тэмцээнд 21 орны 130 гаруй тамирчин оролцож, харааны болон сонсгол сорьсон ой тогтоолтын 10 төрлөөр өрсөлдсөн бөгөөд манай баг тамирчид 90 медалиас 50-ийг хүртэж, бахдам амжилтыг үзүүлсэн. Тэгвэл энэхүү амжилтын үргэлжлэлийг Хятадад зохиогдсон 100 мянган ам.долларын шагналын сантай тэмцээнд Н.Мөнхшүр, Н.Энхшүр, Э.Лхагвадулам, З.Цэцэгзул нар давуулан биелүүллээ.