ЗГ: Төрийн албан хаагчдад олгох урамшууллыг хэлэлцэнэ

Засгийн газрын ээлжит хуралдааныг өнөөдөр 13.00 цагт зарлажээ. Нийт 11 асуудал хэлэлцэхээр төлөвлөсний дотор үр дүнгийн урамшуулал олгох асуудлыг Нийгмийн хамгаалал, хөдөлмөрийн сайд хэлэлцүүлэх аж.

Засгийн газар төрийн албан хаагчдын цалинг нэмэх боломжгүй, харин ажлынх нь үр дүнгээр урамшуулал олгох боломжтой гэж үзэж, 2017 оны төсвийн тодотголыг батлуулахдаа 54 тэрбум төгрөг суулгасан.

2017 он дуусахаас урьтаж, төрийн албан хаагчдад энэхүү урамшууллыг олгоно. Урамшууллыг олгохын өмнө Засгийн газрын хуралдаанаар хэлэлцүүлж, журам батлах учраас өнөөдрийн хуралдаанаар хэлэлцүүлэх юм байна.

Засгийн газрын хуралдаанаар хэлэлцэн шийдвэрлэсэн асуудлын талаар 15.00 цагт Шадар сайд Ө.Энхтүвшин нар сэтгүүлчдэд мэдээлэл хийх аж.

Хэлэлцэх асуудлын дарааллыг хүснэгтээс тодруулан харах боломжтой.

№	Хэлэлцэх асуудал	Засгийн газрын гишүүн
1	Төрийн өмчит зарим хуулийн этгээдийн талаар авах арга хэмжээний тухай	Г.ЗАНДАНШАТАР
2	БНХАУ-ын хөнгөлөлттэй зээлийн хөрөнгөөр хэрэгжүүлэх “Хөдөө аж ахуйн бүтээгдэхүүний үйлдвэрлэлийг дэмжих” төслийн тусгайлсан зээлийн хэлэлцээрийн төсөл	Ч.ХҮРЭЛБААТАР
3	Монгол Улсын Засгийн газар, ОУВС-тай хамтран хэрэгжүүлэх Өргөтгөсөн санхүүжилтийн хөтөлбөрийн багц хүрээнд хэрэгжих “Төсөв, нийгэм болон эдийн засгийн шинэчлэлийн хөгжлийн бодлогын зээл”-ийн тухай	Ч.ХҮРЭЛБААТАР
4	Монгол Улсын Засгийн газар, Дэлхийн банкны Олон улсын хөгжлийн ассоциаци хооронд байгуулсан “Эдийн засгийн удирдлагыг дэмжих хөтөлбөр, Нэгдүгээр хөгжлийн бодлогын санхүүжилт”-ийн хэлэлцээрийг соёрхон батлах тухай хуулийн төсөл	Ч.ХҮРЭЛБААТАР
5	Төлөвлөгөө батлах тухай	Ц.НЯМДОРЖ
6	Үр дүнгийн мөнгөн урамшуулал олгох тухай	С.ЧИНЗОРИГ
7	Олон улсын спортын тэмцээн зохион байгуулах тухай	Ц.ЦОГЗОЛМАА
8	Тогтоолын хавсралтад нэмэлт оруулах тухай	Б.БАТЗОРИГ
9	Монгол Улс, БНСВУ-ын Засгийн газар хоорондын комиссын хуралдааны дүнгийн тухай	Б.БАТЗОРИГ
10	Жагсаалт батлах тухай	Б.БАТЗОРИГ
11	Бусад асуудал*	У.ХҮРЭЛСҮХ
Танилцуулах асуудал
12.	Засгийн газрын 2016 оны 154 дүгээр тогтоолын хэрэгжилтийн явцын талаар	Г.ЗАНДАНШАТАР
13.	Батлан хамгаалахын сайдын гадаад томилолтын талаар	Г.ЗАНДАНШАТАР
14.	Хүнс, хөдөө аж ахуй, хөнгөн үйлдвэрийн сайдын гадаад томилолтын талаар	Г.ЗАНДАНШАТАР