ӨНӨӨДӨР АРВАНХОЁРДУГААР САРЫН 04

ХОТЫН ЦАГ АГААР

Үүлшинэ. Шөнөдөө ялимгүй цас орж, явган шуурга шуурна. Өдөртөө цас орохгүй. Салхи баруун хойноос секундэд 6-11 метр. Шөнөдөө Яармаг-Сонгины орчмоор 30-32 градус, бусад хэсгээр 24-26 градус, өдөртөө 12-14 градус хүйтэн байна.

БАЛЖИННЯМТАЙ ӨДӨР

Сумъяа гараг. Билгийн тооллын 16, Гөрөөсөн толгой одтой, хөхөгчин үхэр өдөр. Өдрийн наран 8 цаг 26 минутад мандан, 17 цаг 06 минутад жаргана. Тухайн өдөр тахиа, могой жилтнээ аливаа үйлийг хийхэд эерэг сайн. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба угаал үйлдэх, мал арилжих, гэр бүрэхэд сайн. Улааны үйлд муу. Өдрийн сайн цаг нь бар, туулай, могой, бич, нохой, гахай болой. Хол газар яваар одогсод баруун хойш мөрөө гаргавал зохистой. Балжиннямтай өдөр.Үс шинээр үргээлгэх буюу засуулахад тохиромжгүй.

энэ өдөр монголын түүхэнд

1998.12.04 НҮБ-ын Ерөнхий Ассамблей Монгол Улсыг цөмийн зэвсэггүй статус мөн болохыг батлав. Өөрөөр хэлбэл, уг тогтоол батлагдсанаар манай улсын тусгаар тогтнол, нутаг дэвсгэрийн бүрэн бүтэн байдал, төрийн бүрэн эрх олон улсын хэмжээнд баталгаажив.

2013.12.04 Соёлын биет бус өвийг хамгаалах ЮНЕСКО-гийн Засгийн газар хоорондын хорооны ээлжит VIII хуралдаан Азербайжаны Баку хотод болов. Хуралдаанаас ЮНЕСКО-гийн Яаралтай хамгаалах шаардлагатай соёлын биет бус өвийн жагсаалтад нэр дэвшсэн монгол уран бичлэгийг санал нэгтэйгээр дэмжин, биет бус өвөө бүртгэжээ.

ӨНӨӨДӨР БОЛОХ ҮЙЛ ЯВДАЛ

09.00

• ‘Дотуур байр-хүүхдийн хөгжлийн орчин’ үндэсний зөвлөгөөн өнөөдөр Кемпински зочид буудалд болно.

10.00

• Улсын Их Хурал дахь Монгол Ардын намын бүлгийн хуралдаан “Жанжин Д.Сүхбаатар” танхимд хуралдана.
• Улсын Их Хурал дахь Ардчилсан намын бүлгийн хуралдаан “Их Эзэн Чингис хаан” танхимд болно.
• СУИС-ийн Оюутан театрт Монгол Улсын Гавьяат жүжигчин, СУИС-ийн Хүндэт профессор, Монголын бий биелгээний дэг сургалтыг үндэслэгч Д.Нанжидын ‘Бүжгийн урлагт 70 жил’ хүндэтгэлийн үйл ажиллагааны хүрээнд туурвисан ‘Монгол бүжгийн сургалт-намба, дэг зохиомж’ номын нээлт, ‘Дунжаагийн Нанжид судлал’ Эрдэм шинжилгээний хурал болно.
• Чингэлтэй хайрханы явган аяллын замын тохижилтын нээлт болно.
• БЗД-ийн эрүүл мэндийн төв-1 амбулаторийн нөхөн үржихүйн эрүүл мэндийн кабинетийн эмэгтэйчүүдийн үзлэгийн өрөө, дасгалын өрөө нийтийн ариун цэврийн өрөөг хөгжлийн бэрхшээлтэй эмэгтэйчүүдэд хүртээмжтэйгээр тоноглож, засварлан тохижуулсныг хүлээлгэн өгнө.

11.00

• УУХҮ-ийн яамнаас зохион байгуулж буй “Ил тод, хариуцлагатай уул уурхай” ээлжит хэвлэлийн бага хурал яамны Хурлын танхимд болно.

14.00

• Багшийн хөгжлийн тухай хуулийн төсөл болон холбогдох бусад хуулийн төслийг хэлэлцүүлэгт бэлтгэх үүрэг бүхий Нийгмийн бодлого, боловсрол, соёл, шинжлэх ухааны байнгын хорооны ажлын дэд хэсгийн хуралдаан Төрийн ордны “В” танхимд болно.
• Банкны тухай хуульд нэмэлт, өөрчлөлт оруулах тухай хуулийн төсөл болон холбогдох бусад хуулийн төслийг хэлэлцүүлэгт бэлтгэх үүрэг бүхий Эдийн засгийн байнгын хорооны ажлын хэсгийн хуралдаан Төрийн ордны “Г” танхимд хуралдана.
• Стандартчилал, техникийн зохицуулалт, итгэмжлэлийн тухай хуулийн төсөл болон холбогдох бусад хуулийн  төслийг хэлэлцүүлэгт бэлтгэх үүрэг бүхий Эдийн засгийн байнгын хорооны ажлын хэсгийн хуралдаан Төрийн ордны 334 тоот өрөөнд болно.
• Нийслэлийн эрх зүйн байдлын тухай хуулийн шинэчилсэн найруулгын төсөл болон холбогдох бусад хуулийн төслийг хэлэлцүүлэгт бэлтгэх үүрэг бүхий Төрийн байгуулалтын байнгын хорооны ажлын хэсгийн хуралдаан Төрийн ордны “Жанжин Д.Сүхбаатар” танхимд хуралдана.

ӨНӨӨДРИЙН ЭВЕНТ

12.00

• Биологи болон анагаахын чиглэлээр эрдэм шнжилгээ, судалгааны ажил хийж буй судлаач оюутан, залуусын сурч боловсрох, өөрийгөө хөгжүүлэх, бүтээлээ олонд хүргэх, тэдний эрдэм шинжилгээ, судалгааны ажлыг дэмжих зорилгоор 2 жил тутамд зохион байгуулагддаг ‘Symposium-2017’ эрдэм шинжилгээний бага хурал АШУҮИС-ийн Оюутны соёлын төвд болно.

14.00

• МҮХАҮТ-аас чөлөөт бүсийг хөгжүүлэх, сурталчлах үйл ажиллагааны хүрээнд Монгол Улсын засгийн газраас Дэлхийн банктай хамтран хэрэгжүүлж байгаа “Экспортыг дэмжих төсөл” болон “Алтанбулаг”, “Замын Үүд”, “Цагааннуур” чөлөөт бүсүүдийн захирагчийн ажлын албадтай хамтран “Чөлөөт бүсийн олон улсын туршлага” сэдэвт семинарыг МҮХАҮТанхимын 5 давхарт 507 тоот хурлын танхимд зохион байгуулна.