Лондоны олимпоос эхтэй Оросын тамирчдын допингийн дуулиантай холбоотойгоор Олон улсын олимпийн хороо /ОУОХ/-ноос тус улсын нэр бүхий тамирчдын олимпод өрсөлдөх эрхийг бүх насаар нь хассан байна.

Өчигдөр зарласан шинэ хоригт Сергей Чудинов, Алексей Негодайло, Дмитрий Труненков, Яна Романова, Ольга Вилухина нарын таван нэр багтжээ.

Негодайло, Труненков нар 2014 оны Сочийн олимпийн бобслейн эрэгтэйчүүдийн дөрвөн хүнтэй багийн төрөлд түрүүлсэн юм. Харин Романова, Вилухина нар биатлоны буухиа төрөлд мөнгөн медаль хүртсэн. Вилухина мөн 7.5 км-ын уралдаанд мөнгөн медаль зүүжээ.

Оросын тамирчид сэргээш хэрэглэдэг, түүнийгээ нуун дарагдуулдгийг илчилсэн профессор Ричард МакЛарены 2016 онд нийтэлсэн мэдээллийн дагуу ОУОХ шалгалт явуулж, арваннэгдүгээр сарын 1-нд Оросын тамирчдын эрхийг хассан болохоо зарласан юм. Улмаар даваа гаригт /2017.11.27/ хоригт багтсан тамирчдын нэрсийг бүрэн эхээр нь анх удаа олон нийтэд нийтэлжээ.

Ингэснээр арваннэгдүгээр сарын 1-нээс хойш ОХУ-ын өвлийн спортын нийт 19 тамирчин насан туршдаа олимпод өрсөлдөх эрхгүй болж байна.

Түүгээр ч зогсохгүй ОУОХ-ноос ирэх хоёрдугаар сарын 9-нд Өмнөд Солонгосын Пёнчан хотод эхлэх өвлийн олимпод ОХУ-ыг оролцуулах эсэхийг хэлэлцэхээр болжээ. Энэ талаарх эцсийн шийдвэрийг ОУОХ арванхоёрдугаар сарын 5-нд эхлэх дараагийн хурлаас гаргах гэнэ.

ОЛИМПОД ӨРСӨЛДӨХ ЭРХЭЭ ХАСУУЛСАН ТАМИРЧИД:

“Сочи-2014” олимпоос алтан медаль хүртсэн:

1. Александр Легков /цанын уралдаан/
2. Алексей Негодайло /дөрвөн хүний бобслей/
3. Александр Третьяков /өврийн чарга/
4. Дмитрий Труненков /дөрвөн хүний бобслей/
5. Александр Зубков /хоёр ба дөрвөн хүний бобслей/

“Сочи-2014” олимпоос мөнгөн медаль хүртсэн:

1. Ольга Фаткулина /500 м, тэшүүр/
2. Яна Романова /биатлоны буухиа төрөл/
3. Ольга Вилухина /биатлоны буухиа болон 7.5 км-ын ганцаарчилсан төрөл/
4. Максим Вылегжанин /цанын уралдаан/

“Сочи-2014” олимпоос хүрэл медаль хүртсэн:

1. Елена Никитина /өврийн чарга, эмэгтэй/

Бусад тамирчид:

1. Евгений Белов /цанын уралдаан/
2. Юлия Иванова /цанын уралдаан/
3. Сергей Чудинов /өврийн чарга/
4. Алексей Петухов /цанын уралдаан/
5. Евгения Шаповалова /цанын уралдаан/
6. Мария Орлова /өврийн чарга/
7. Ольга Потылицына /өврийн чарга/
8. Ольга Стулнева /бобслей/
9. Александр Румянцев /тэшүүр/

С.ЦЭЛМЭГ