МАН-ын шатсан төв байрны буурин дээр төсөв, хандивын хэдэн тэрбум төгрөгөөр сүндэрлэж буй Тусгаар тогтнолын өргөөний үүдийг ирэх есдүгээр сард нээхээр болжээ. Уг нь улсын баяр наадмаар өрхийг нь татахаар төлөвлөж байсан ч дотоод заслын ажил жаахан саатсан аж. Гаднаас нь харвал шил толь болсон цэмцгэр ордон хэзээ мөдгүй ашиглалтад ороход бэлэн болсон байна.

Гурван жилийн өмнө, долдугаар сарын 1-ний үймээний хөлд үрэгдэж шатсан цагаан байр ийнхүү тансаг өргөө болон төрөл арилжлаа. Харин тасарсан таван амь, баригдаж хоригдсон улс төрийн хоригдлуудын үнэн мөнийг олох ажил л таг чиг хоцорлоо.