Орхон аймгийн Иргэдийн Төлөөлөгчдийн Хурлын дарга П.Пүрэвлхагвын санаачлагаар Орхон аймаг анх удаа хүүхдийн найрал дууны “Эрдэнэс” чуулгатай боллоо. "Эрдэнэс" чуулга 90 хүүхдийн бүрэлдэхүүнтэй бөгөөд Орхон аймгийн ерөнхий боловсролын бүх сургуулиас төлөөлөл оролцжээ. Чуулгын удирдаач багшаар "Баян-Өндөр" цогцолбор сургуулийн дуу хөгжмийн багш МУСТА Ц.Өлзийсайхан ажиллаж байна. Уг чуулгыг ИТХ-аас баталсан “Мэдлэгт суурилсан Эрдэнэт” хөтөлбөрийн хүрээнд байгуулж багшийн цалин болон хүүхдүүдийн тоглолтын хувцасны зардлыг орон нутгаас гаргахаар болжээ. “Эрдэнэс” чуулгын нээлтийг Монголын хүүхдийн байгууллага байгуулагдсаны 92 жилийн ойн хүрээнд хийж байгаагаараа онцлог юм. Чуулгын зорилго нь хүүхдүүдийг урлагаар дамжуулж хүмүүжүүлэх, соён гэгээрүүлэх, Орхон аймгийн брэнд соёлын үйлчилгээ бий болгох ач холбогдолтой юм. Ийнхүү Монголын Үндэсний Радиогоос улбаатай хүүхдийн найрал дууны хамтлаг өдгөө орон нутагт шинээр байгуулагдаж байгаа нь түүхэн үйл явдал гэж чуулгын нээлтэд оролцсон зочид хэлж байлаа. Дашрамд дурдахад, Монголын Радиогийн дэргэдэх “Улаан бүч” найрал дууны хамтлаг тухайн цаг үеийнхээ шилдэг нь байж сор бүтээлүүдээ гаргаж байсан юм.
ЭХ СУРВАЛЖ: WWW.ERDENET.MN