Хүүхдийн хорих анги буюу Шүүхийн шийдвэр гүйцэтгэх ерөнхий газрын харъяа Зайсан дахь 411 дүгээр хорих ангид хүмүүжиж байсан зургаан хүүхэд өнгөрсөн долоо хоногт оргов. Тэд гэгээн цагаан өдөр хорихын таван метрийн өндөртэй флокон хашааг нүхлээд, цөмлөөд зугатчихсан гэнэ. Үүнийг хамгаалалтад гарч байсан харуулуудын нэг ч нь анзаарсангүй.

Тэгэхээр хоригдол хөв­гүүдэд онцгой гэмээр авьяас байгаа нь лавтай. Блокон хашааг дуу гаргахгүй нурааж, үүрэг хүлээсэн харуулын чихийг тэрхэн хоромд дү­лийрүүлж дөнгөсөн гэхээр тэр л дээ. Тэр ч бүү хэл “Танайхаас хоригдол оргосон юм уу?” гэх сэтгүүлчийн асуултад тэд “Үгүй” хэмээн хариулсан байгаа юм. Энэ үнэхээр онцгой тохиолдол шүү. Ийм чадварлаг ор­годлууд ер нь манай улсын түүхэнд битгий хэл дэлхийд бас их ховор л байдаг байх. Мэдээж кинон дээр шоронгийн чулуун ханыг нүхэлж, зу­гатах нь хэвийн үзэгдэл болсныг эс тооцвол шүү дээ. Иймд оргодол хөвгүүдийг “Авьяаслаг монголчууд” шоунд оролцуулж, хөөрхий юу ч мэдэрдэггүй тэр ха­руу­луудыг нь хөгжөөн дэм­жигчээр нь бүртгэвэл та бид үзээгүйгээ үзэх юм биш үү.

Дээр нь, оргодол хөв­гүүдийг “Хүүхдүүд учраас аюултай гэж бодохгүй бай­на” хэмээн санаа амар ярилц­лага өгөөд сууж байгаа Шүү­хийн шийдвэр гүйцэтгэх ерөн­хий газрын Олон нийттэй харилцах албаны ажилтан, дэслэгч Х.Баясгаланг шоу­ны  шүүгчээр хүн­дэтгэн өргөмжилмөөр. Мань мэт бодохдоо “За, хулгайн хэрэгтэй нь ч яах вэ. Хүний амь насанд хүрэхгүй шиг хулгайгаа хийгээд явбал ба­рав. Харин тэр хүчингийн гэмт хэрэгтэн юу хийх бол доо” гээд эмээж суухад Х.Баясгалан дэслэгч ёстой л уужуу тайван сэтгэлтэй нэгэн аж. Иймд “Монголын тал  нутаг яасан уужуу юм бэ” хэмээн дуулж байхаар “Х.Баясгалан дэслэгчийн үг ерөөл хураах болтугай” гээд дор бүрнээ залбирч суувал яасан юм бэ. Хоригдол нь адтай, харуул нь хааш яаш, дэслэгч нь дэмий амгалан…Эцэст нь харин эгдүүцэн, зэвүүцэх нь юуны учир вэ. Би арай тэнэг хүн шиг айгаад байгаа юм биш байгаа даа. Уг нь дэслэгч эгч “Айлтгүй ” л гэж хэлсэн юм даа.