Маргааш Монголын төмөр замчдын баярын өдөр тохиож байна. Өнөө жил “Вант улс”-ынхан 62 дахь жилийнхээ ойг тэмдэглэх аж. Тус салбарыг удирдаж буй Т.Очирхүү даргын хувьд  салбарынхан нь ам сайтай байдаг. Сүүлийн 20 орчим жилд тэрбээр УИХ-ын гишүүн, сайд гээд төр, засгийн өндөр албан тушаалыг хашиж байсан болохоор ч тэр үү, богино хугацаанд цөөнгүй ажил амжуулсан, ажил хэрэгч нэгэн. Сая наадмын дараа Засгийн газраас төмөр замын салбарт бүтцийн өөрчлөлт хийхээр болсон билээ. Ингэснээр “Улаанбаатар төмөр зам”-д ачаа, зорчигч тээвэр гэсэн хоёрхон зүйлийг л үлдээхээр болж буй  юм. Түүнээс бус энэ айлын нуруун дээр эмнэлэг, цагдаа гэх мэтчилэн ойролцоогоор 10 гаруй нэгж “чирэгдэж” явдаг юм билээ. Өөрөөр хэлбэл, орчин үеийн төмөр замын салбар цомхон бүтэцтэй болж, шинэ хэлбэрт шилжиж байгаа гэсэн үг. Тэгээд ч ашигт малтмалын томоохон ордуудыг эдийн засгийн эргэлтэд оруулах нь нэгэнт тодорхой болсон ийм үед энэ “айлын” тус нэмэр асар их юм. Тийм ч учраас уг шинэчлэлийн  бэлтгэлийг энэ онд хангаад 2015 он хүртэл гурван үе шаттай хэрэгжүүлэх юм билээ. Гэхдээ халаа сэлгээ, орон тооны асуудал гэхээсээ төмөр замыг системээр нь өөрчилж байгаа хэрэг. Энэ нүсэр ажлыг ойн баярынхаа өмнө Т.Очирхүү болон түүний багийнхан эхлүүлж, шинэ төмөр замын зүг “замчлахаар” болж буй аж.