3,381.01
Засгийн газрын хэрэгжүүлэгч агентлаг Нийгмийн хөдөлмөр халамж үйлчилгээний хэлтсээс эмзэг давхрагийн айл өрхөд хүнсний талон олгох ажлыг одоогийн байдлаар дөрвөн аймаг, нэг дүүрэгт хэрэгжүүлж байгаа юм. Энэ ажил нь анх 2010 оноос туршилтын хэлбэрээр хийгдэж эхэлсэн бөгөөд үүний хүрээнд нийгмийн эмзэг бүлгийн ард иргэдийн дунд судалгаа явуулж нийт 4000 гаруй өрхийг хамруулжээ. Холбогдох албаны хүмүүс орлогоор эрэмбэлэх аргаар судалгаа явуулж судалгаанд хамрагдсан нийт өрхийн жагсаалтаас улаан шугаман доор таслагдан орсон айл өрхүүдэд талон тарааж байгаа юм байна. Тус ажил нь Хөвсгөл, Ховд, Дундговь, Дорнод зэрэг нийт алслагдсан дөрвөн аймаг болон Улаанбаатар хотын Сонгинохайрхан дүүрэгт хийгдэж байгаа юм. Эдгээр таван бүсэд зөвхөн хүнсний талоноор хүнс олгох дэлгүүр ажиллах гэнэ. Энэхүү хүнсний талоноор үйлчлэх харьяа дэлгүүрүүдийг аймаг, дүүргийн Засаг даргын ажлын албанаас тендер зарлан сонгон шалгаруулсан ажээ. Уг сонгон шалгаруулалтанд тэнцсэн дэлгүүрүүд зөвхөн хүнсний талоноор хүнсний бараа, бүтээгдэхүүн өгөх бөгөөд энэ ажлыг аймаг болон дүүргийн Засаг даргын ажлын хэсэг хянаж шалгаж байх юм. Энэхүү ажлыг хэрэгжүүлснээр нийгмийн эмзэг давхарагын иргэдийг цаашид хүнсний талоноор ханган айл өрхийн амжиргааны түвшинг дээшлүүлэхэд гол үүрэг чиглэл нь оршиж байгаа ажээ. Одоогийн байдлаар дөнгөж туршилтын шатандаа явж байгаа бөгөөд цаашид амжилттай хэрэгжих юм бол жил болгон хүнсний талон тараах ажлыг өрнүүлэх гэнэ. Энэхүү талон нь сард нэг тараагдах бөгөөд насанд хүрсэн 16-аас дээш насны иргэнд 10 мянган төгрөг, харин 16-аас доош насны хүүхэд болон нярай хүүхдэд 5 мянган төгрөгийн талон олгож байгаа ажээ. Уг ажлын хүрээнд нийслэлийн хүнсний талон тараах ажлыг Хөдөлмөр халамж үйлчилгээний хэлтсийн Хүн ам, гэр бүл хариуцсан хэлтэс хариуцан ажиллаж байгаа аж.
Б.Нарансолонго:ТАЛОН НЬ НЭГ САРЫН ХУГАЦААНД ХҮЧИНТЭЙ
-Энэхүү ажлыг хэзээнээс эхлэн хэрэгжүүлж байгаа вэ?
-Энэ хүнсний талон олгох ажил нь анх 2010 оноос Монгол Улсын Засгийн газрын хэрэгжүүлэгч агентлаг Нийслэлийн хөдөлмөр халамж үйлчилгээний хэсэгийн ажлын хүрээнд туршилт судалгаа хэлбэрээр анх ажлын хэсэг гарган ажилласан юм. Харин энэхүү ажил нь одоогийн байдлаар туршилтын байдлаар хийгдэж байгаа. Ер нь одоогийнбайдлаар хүнсний талон тараах ажил ерөнхийдөө дуусах шатандаа орж байна.
-Хүнсний талоныг харьяа дүүргүүдэд нь хуваарилж байгаа юу?
-Бид уг ажлын хүрээнд нийгмийн эмзэг бүлгийн болон амьжиргааны түвшнээс доогуурх айл өрхүүдийг судалгаанд хамруулж, тэднээс орлогоор нь эрэмбэлж шугам татаж тэр шугамаас доогуур орсон иргэдийг сонгон авсан. Нийт судалгаанд Хөвсгөл, Ховд, Дорнод, Дундговь мөн Улаанбаатар хотоос Сонгинохайрхан дүүргийг хамруулсан. Энэ таван ажлын хэсгээс 4120 өрх, 26571 иргэн хамрагдсан юм. Цаашид бид нэлээд олон дүүргийг хамруулан уг ажлыг хийхээр төлөвлөж байгаа.
-Тэгэхээр хүнсний талоноор хаана үйлчлүүлэх хийх вэ?
-Бид аймаг, дүүргийн Засаг дарга нартай хамтран ажиллаж харьяа дүүрэг болон аймгийн Засаг дарга нарт танилцуулсан. Харин Засаг дарга нар хүнсний талонаар үйлчлэх хүсэлтэй дэлгүүрүүд дунд сонгон шалгаруулах тендер явуулсан. Тендерээс шалгарсан дэлгүүрүүд хүнсний талонаар зөвхөн хүнсний хэрэглээний барааг худалдаалах юм.
-Хүнсний талоны нийт хэрэглээний үнийн дүн нь хэд вэ, Хүүхэд том хүн гэж заагласан байгаа юу?
-Мэдээж бид анх судалгаа хийж байх явцдаа хоол тэжээлийн харьцуулалт хийсэн. Тэгээд бид том хүн буюу 16-аас дээш насны иргэдэд 10 мянган төгрөгийн талон харин түүнээс доош насны иргэдэд 5000 төгрөгийн талон өгөхөөр тогтсон юм. Энэхүү талон нь сарын хугацаатай бөгөөд нэг сард хэрэглэх хүнсний хэмжээнээс гурав дахин багаар тооцож өгч байгаа юм л даа.
-Хүнсний талон тараах ажил ирэх онд хэрэгжих үү?
-Бид юутай ч ойрын хоёр жил судалгаа туршилтын байдалтай хэрэгжүүлж байна. Одоо л хийсэн ажлынхаа үр дүнг хүлээгээд сууж байна. Хэрэв энэхүү хүнсний талон тараах ажил маань хүртээмжтэй болж чадвал бид энэ ажлыг хэрэгжүүлнэ гэж төлөвлөж байгаа. Уг ажлыг хэрэгжүүлснээр манай улсын нийгмийн эмзэг давхарага болон амжиргааны түвшингөөс доогуур иргэдийн амьдралыг сайжруулахад гол үүрэг оршиж байгаа юм.
Тэрбээр ийн ярив. Энэ нь нийгмийн сайн сайханд чиглэсэн ажил бөгөөд манай улсад байгаа нийгмийн эмзэг хэсгийн зарим өрхөд хүрч чадаж байна. уг ажил нь цаашид хэрэгжиж олон аймаг, дүүрэг цаашилбал улсын хэмжээнд хүргэхийг зорин ажиллахыг хичээж байна.
"Улс төрийн тойм" сонин
