Сүүлийн үед исламын ертөнцийн дарангуйлагч орны тоонд зүй ёсоор багтаад байгаа Сири улсын Ерөнхийлөгч Башар аль-Асад албан тушаалаа өгөхгүй гэдгээ мэдэгдсэн. Тэрбээр М.Каддафигаас өөр хүн байжээ. Ерөнхийлөгч Башар аль-Асад  “Засгийн эрхэнд увайгүй дээрэмчид гарахын тулд улсын зэвсгийн агуулах тонож, дээрэмдэж, төрийн эсрэг жагсагчид мэт босч байгаа нь ийм нөхцөл байдлыг бий болгосон” гэсэн юм.

Өнгөрсөн хавар Арабын орнуудад “Хувьсгалын хар шуурга” хэд хэдэн орныг дайран өнгөрсөн талаар бид мэдэж байгаа билээ. Харин эдгээр орноос Ливи, Сирийн удирдагч нар бууж өгөхөөс татгалзаж, ард түмний эсрэг буу шагайсаар байгаа. “Ливийн асуудлыг дэлхий нийт сайн мэдэж байгаа бол Сирийн талаар хүмүүс төдийлөн бүрэн дүүрэн ойлголтгүй байгаа нь нэг талаараа хэвлэл мэдээллийн хэрэгслүүдийн дутагдалтай тал” хэмээн CNN агентлагийн сурвалжлагч Жон Шаттер хэлсэн аж.

НҮБ болон хүний эрхийг хам­гаалах байгууллага, олон улсын хэвлэл мэдээллийн хэрэгслүүд хамт­ран Сирид мөргөлдөөнөөс болж хэдэн хүн нас барсныг тогтоохоор судалгаа явуулжээ. Судалгааны дүнгээс харвал үнэхээр гамшгийн байдалтай байгаа нь нотлогджээ. Өдөр өнжихгүй “Олон хүн нас барлаа” гэх мэдээлэл цацагдсан байгаа нь өнгөрсөн лхагва гарагт хуралдсан НҮБ-ын анхаарлын төвд орсон юм. НҮБ-ын эн­хийг сахиулах албаны дэд команд­лагчийн хэвлэлийн төлөөлөгч “НҮБ Сирийн талаар нухацтай авч хэ­лэлцлээ. Нийт 3200 гаруй хүн амь үрэгдэж, 12640 хүн ямар нэгэн байдлаар шархадсан гэсэн судалгаа биднийг цочирдууллаа. Ямартай ч нөхцөл байдал ийм болсонд бид Сирийн ард түмнээс хүлцэл өчье. Учир нь бид маш их хугацаа алдсан” гэжээ.

НҮБ-ын Ерөнхий нарийн бичгийн дарга Бан Ги Мун “Бид өмнө нь Ливид хэтэрхий их анхаарал хандуулж байж. Өнөө маргаашийн дотор Сирид хүний эрхийг хамгаалах, энхийг сахиулах цэргийг илгээх тал дээр дахин авч хэлэлцэнэ. Энэ тал дээр онцгой анхаарна” гэсэн юм. Сирид манай цагаар лхагва гаргаас пүрэв гарагт шилжих шөнө тус улсын армийн хуягт танкууд болон босогчдын хооронд ширүүн мөргөлдөөн болж 45 хүний аминд хүрсэн талаар CNN агентлаг мэдээлжээ.  Хамгийн гол нь Сирийн эрх баригчид энэ үйлдлээ “Маш олон босогч, тэсрэх бодистой, хагас зэвсэглэсэн ирж байсан. Бид гурван удаа анхааруулга өгсөн боловч тэд гал нээснээр 45 хүний амь нас хохирлоо” гэсэн юм.

НҮБ-ын Аюулгүйн зөвлөлийн хэвлэлийн төлөөлөгч Энтуан Харри­сон уг асуудал дээр өөрийн байр сууриа илэрхийлсэн юм. Тэрбээр “Хэрэв ард түмэн Засгийн газраас болон төрийн зүгээс ямар нэг зүйл хүсэж, шаардаж байгаа бол тэрнийг нь өгөх л үүрэгтэй. Улс орон гэдэг эцсийн дүндээ ард түмний эрх ашгийг хамгаалах эцэг нь юм. Сирийн хувьд заавал НҮБ-ын энхийг сахиулах цэр­гүүдийг эх орондоо оруулж, асууд­лыг хүндрүүлэх шаардлага байхгүй” гэсэн нь ОХУ болон БНХАУ-ын НҮБ дахь төлөөлөгчдийн дургүйцлийг хүргэсэн талаар “Reuters” агентлаг мэдээлэв.  “НҮБ-ын зүгээс Ливийн асуудлыг Сиритэй холбож хэрхэвч болохгүй гэсэн үүднээс Сирид цэрэг илгээх тал дээр нухацтай хандах ёстой” гэсэн байр суурьтай байгаа аж.

Мөн “Associated Press” агент­лагийн сурвалжлагч Эдди Гилберт Сири улсаас мэдээлсэн байна. Тэрбээр “Сирид яг одооний байдлаар нөхцөл байдал тун хүнд байна. Хүмүүс хаана байгаагаа ойлгохгүй харсан зүгтээ гүйлдэж байна. Уржигдраас эхэлсэн жагсагчдын эсэргүүцэл томоохон цар хүрээтэй болж байна. Хүмүүсийн ярьж байгаагаар энд “Сирийн эрх баригчидын эсрэг ард түмэн байлдаж байна” гэсэн мэдээлэл байна. Харин эрх баригчид танкаар зэвсэглэсэн цэргүүд илгээж 45 хүний аминд хүрсэн нь ард түмний уур уцаарыг ихээхэн хүргэжээ” хэмээн Сирийн Хама хотоос мэдээлжээ.

Хүний эрхийг хамгаалах “Амнести интернэшнл” байгуул­ла­гын шинжээчид нийт амь үрэгдсэн хүмүүсийн тоог анх дуулаад “Маш их гайхаж бай­на. НҮБ энэ талаар мэдээлэлтэй байсаар байж яагаад одоо л нэг анахааралдаа авч байгаа юм бэ” хэмээн шүүмжилсэн талаар “The Times” онцолжээ.

Ливид ганц хүний ноёрхол да­вамгайлж байгаа бол Сирид Ерөн­хийлөгчөөс гадна гүйцэтгэх засаглалын олон хүн ард түмний эсрэг зогсож байгаа нь гол ялгаа юм.  Ямартай ч НҮБ-ын зүгээс цэрэг оруулах болсон талаар тодорхой мэдэгдэл хийсэнгүй. Энэ асуудал дээр нухацтай авч хэлэлцэх болсон талаар хэвлэлийн төлөөлөгчид олон нийтэд мэдэгдсэн билээ.