Монгол Улсын Ерөнхийлөгч Цахиагийн Элбэгдоржид Япон Улсын Кансай Эдийн засгийн Холбооны дэд дарга, “Panasonic” корпорацийн Удирдах зөвлөлийн дэд дарга, ноён Масаюки Масушита тэргүүтэй төлөөлөгчид өнөөдөр бараалхлаа. Уулзалтын эхэнд ноён Масаюки Масушита, Монгол Улсын Ерөнхийлөгч 2010 оны арваннэгдүгээр сард Япон Улсад хийсэн Төрийн айлчлалынхаа үеэр Кансай мужид зочилсонд дахин талархал илэрхийлээд 2011 оны гуравдугаар сарын 11-нд Япон Улсад болсон газар хөдлөлтийн гамшгийн үеэр Монголын ард түмэн болон төр засаг хамгийн түрүүнд эмгэнэл илэрхийлж гамшгийн хүнд хэцүү бэрхшээлийг сэтгэлийн хаттай даван туулахад ихээхэн дэмжлэг үзүүлсэнд талархаж буйгаа хэлэв. Мөн тэрээр Кансай Мужийн бүс нутагт байгальд ээлтэй, өндөр технологи хөгжүүлсэн олон компаниуд үйл ажиллагаагаа явуулдаг гээд агаар усны болон хөрсний бохирдолын эсрэг байгальд ээлтэй бодлогыг Кансай муж бүхий л талаар баримталдаг гэдгийг онцлоод цаашид хүрээлэн байгаа орчинд ээлтэй технологийг улам бүр хөгжүүлж Монгол Улстай хамтран ажиллах хүсэлтэй байгаагаа илэрхийлэв.
Монгол Улсын Ерөнхийлөгч Цахиагийн Элбэгдорж уулзалтын үеэр хэлсэн үгэндээ, 2011 оны 3 дугаар сарын 11-нд учирсан байгалийн гашгийн хохирлыг Японы ард түмэн богино хугацаанд даван туулна гэдэгт итгэлтэй байгаагаа илэрхийлээд Япон Улсын Кансай Мужийн хувьд байгальд ээлтэй дэвшилтэт технологийн бодлогыг хэрэгжүүлж байгааг дэмжээд Монгол Улсын нийслэл Улаанбаатар хотын өмнө тулгараад байгаа утаа, агаарын бохирдлын асуудлыг бууруулах улмаар энэ төрлийн бэрхшээлийг байхгүй болгоход цаашид идэвхитэй хамтран ажиллахыг хүссэн юм.
