1997 оны арваннэгдүгээр сарын 19-ний өдөр дэлхийд анх удаа долоон ихэр хүүхэд мэндэлснийг санаж байна уу? Тэд эрүүл саруул өсч торнин, одоо 20 настай залуус болжээ.

Ихрүүдийн ээж Бобби МакКой тухайн үед олон нийтийн шүүмжлэлд багагүй өртсөн ч хүүхдүүдээ эрүүл саруул төрүүлэхийн тулд тэр бүхнийг тэвчиж чадсан юм.

Эмч нар долоон ихэр хүүхэд бүгд амьд төрөх магадлал нь тун бага. Ээж нь ч эрсдэж магадгүй гэж санаа зовж байв. Гэсэн ч Бобби бүхнийг бурханд даатгаж, хүүхдүүдээ төрүүлэхээр шийдсэн юм. Ихрүүдийг Кенни, Келси, Натали, Брэндон, Алексис, Натан, Жоэль гэдэг. Хүүхдүүд бүгд ээжээсээ эрүүл мэндэлсэн ч эмч нар тэдний ирээдүйд санаа зовсон хэвээр байв.

Бобби МакКойны хувьд ихрүүдийн мэндэлсэн өдөр гэр бүлийн баяр. “Цаг хугацаа харвасан сум мэт хурдан өнгөрч байна. Баяр баясгалан, уй гуниг, бухимдал, инээд хөөр гээд өнгөрсөн хугацаанд би маш их зүйлийг туулж өнгөрүүлсэн. өнөөдөр бид элэг бүтэн, аз жаргалтай амьдарч байна” хэмээн Бобби телевизэд ярьжээ.

Дөнгөж төрсөн Бобби МакКойд тухайн үеийн АНУ-ын ерөнхийлөгч Билл Клинтон утсаар баярын мэндчилгээ дэвшүүлж байсан юм. Мөн телевизийн алдарт хөтлөгч Опра шоугаараа дамжуулан тэдэнд зориулж байшин, машин, хүүхдийн тэжээл, живх, их сургууль, коллежид үнэгүй суралцах эрхийг бичиг зэргийг бэлэг болгон илгээж байлаа.

Хэдийгээр 20 жил өнгөрсөн ч МакКой болон түүний гэр бүл өнөөг хүртэл Америкийн ард түмний бэлэглэсэн байшиндаа амьдарч байгаа. “Би найз нөхөд, гэр бүл, сайхан сэтгэлтэй ард түмнийхээ туслалцаагүйгээр хүүхдүүдээ өсгөж чадахгүй байх байсан” хэмээн Бобби ярьжээ. Энэ бол зүйрлэшгүй том тусламж хэмээн тэрбээр телевизийн ярилцлагын үеэр өөрт нь тусалсан бүх хүмүүст талархал илэрхийлсэн юм.

БЭЛТГЭСЭН: Э.ЦЭЦЭГ

ЭХ СУРВАЛЖ: КУЛЬТУРОЛОГИЯ