Олимпийн аваргыг ялагч

“Ньюс агентлаг” шинээр бүрдсэн парламентын гишүүдийг цагаан толгойн үсгийн дарааллын дагуу цувралаар танилцуулж буй. Өнөөдрийн “76:1”-д УИХ-ын гишүүн Магваны БИЛЭГТ-ийг танилцуулж байна.

Төрийн өндөр дээд алба хашиж байхдаа хууль бусаар хөрөнгөжин, түүнийгээ оффшор бүсэд байршуулсан бол хариуцлагаа хүлээн огцрохыг шаардаж, оффшорын эсрэг тэмцэх лобби бүлэг байгуулснаа зарласан УИХ-ын арван гишүүний нэг нь М.Билэгт юм.

Оффшорын эсрэг тэмцэх лобби бүлгийн анхны ажил УИХ-аас оффшорыг зохицуулах хуулийг батлуулснаар эхэлсэн бол одоо УИХ-ын харьяанд оффшорт хяналт тавих дэд хороо ажиллах ёстой гэж үзэж байна.

Олон нийтийн зүгээс оффшорыг зохицуулах хуулийг “Үндсэн хууль зөрчсөн, хүний эрхийг зөрчсөн бүдүүлэг хууль” гэж тодотгож байгаа бол М.Билэгт гишүүний хувьд “Хууль үйлчилж эхэлснээр ёс зүйгээр зохицуулагдахгүй байгаа олон асуудал цэгцэрнэ” гэж үзэж буй.

Бөхөөр яривал, олимпийн аварга Н.Түвшинбаярыг “өвдөг шороодуулсан” түшээ юм.

2016 оны УИХ-ын сонгуульд Баянхонгор аймагт нэр дэвшихэд олимпийн аваргатай учраа таарчээ. Энэ сонгууль нь түүний хувьд гурав дахь удаагийн сонгууль байв. 2004 оны УИХ-ын сонгуулиас эхлэн тасралтгүй Баянхонгор аймагт нэр дэвшин өрсөлдсөн ч тэр бүрт ялагдаж явсаар гурав дахь удаагийнханд амжилттай оролцжээ.

Барилгын техникумыг, Геодезийн техникч мэргэжлээр төгссөн. 1980-аад оны үед хөдөө орон нутагт техникумын анги очих нь ховор. Ирлээ гэхэд дарга нарын голдуу хүүхэд хуваарийг нь арын хаалгаар авдаг байсан аж. Харин тэр жил сурлагын үзүүлэлтээр нь хуваарилснаар М.Билэгтэд Барилгын техникумд суралцах эрх таарч, Улаанбаатар хотын оюутан болжээ.

Сургуулиа төгсөөд Улсын геодези, зураг зүйн газар техникчээр ажиллах болсон байна. Удалгүй тус газрынхаа Хувьсгалт залуучуудын эвлэлийн хорооны дарга болж томорчээ.

Харин Монгол Улс ардчилсан нийгэмд шилжсэнээр Эвлэлийн хорооны дарга нар ажилгүй болж, цомхотголд өртөхөд амьдралаа авч явахын тулд оёдолчин болсон.

Эцэг, эхээс арвуулаа шахам өнөр өтгөн айлын ууган охин тул тэр үеийнхний жишгээр ээждээ нэмэр болж, дүү нарынхаа дээл, хувцсыг оёж сурсан нь амьдралд нь хэрэг болж, нэг хэсэгтээ үйл хийжээ.

Картын бараанд шилжиж, өмсөх зүүхээр ховордсон цаг үе байсан тул цамц, хослол, хантааз гээд юм, юм л оёж, нөхөрлөл, хоршооны дэлгүүрт тавьж заруулдаг байсан гэнэ.

Гэтэл монголчууд Эрээн рүү наймаанд явдаг болж, эрээн мяраан хувцас хунар авчирах болсноор оёсон юмнууд нь зарагдах нь багасч, эрэлт муудахад ажлаа солихоос аргагүй болж, ганзагын наймаанд гарчээ.

Нөхөр нь Эрээн гарч бараа татаж ирнэ, түүнийг нь М.Билэгт хойд хөрш рүү гаргаж зарна. Нэг “гахай” 50-60 кг татна. Эмэгтэйчүүдийн хувьд амаргүй хөдөлмөр. Гэвч түүнийгээ үүрч, дүүрэн явж борлуулж нэлээд хэдэн жилийг ардаа хийн зүтгэжээ.

Оросын цагдаа нарт “гахай” үүрч явж таарвал бараагаа хураалгах эрсдэлтэй, бараагаа зарчихаад валютаа солиулахад ченж нарт нь хулхидуулах тохиолдол ч гарна.

Тэр үеийн ганзагын наймаачдын туулсан зовлон бүрийг туулж, шантрахгүй зүтгэсээр ард нь гарчээ.

Дөрвөн жилийн дараагаас урд, хойд хөршийг зорьдог урсгалаа сааруулж, Герман явж, шоклад бөөндөх болсон байна. Нэг ёсны овоо том хөдлөх эргэлтийн хөрөнгөтэй болсон тул барааныхаа нэр төрлийг үндсэнд нь өөрчилж, хүнсний бараа руу орж эхэлсэн нь энэ аж.

Гадаад руу явж нүд тайлж эхэлсний хүчинд хүнсний бүтээгдэхүүн зарахад тохилог орчин хэрэгтэйг олж харан дэлгүүр бариулах ажилдаа оржээ. Монголд анхны гэж хэлж түрээсийн хувийн дэлгүүр ашиглалтад орсны нэг нь “Ачлал” дэлгүүр юм байна.

“Ачлал”-ын М.Билэгт гэж нэрлэгддэг нь ийм учиртай.

Хөрөнгө орлогын мэдүүлэгтээ тэрбээр 750 сая төгрөгийн өртөгтэй нэг хаустай хэмээн мэдүүлжээ.

УИХ-д сонгогдсон цагаасаа хойш Согтууруулах ундаа хэтрүүлэн хэрэглэсэн этгээдийг албадан эрүүлжүүлэх тухай хуульд нэмэлт өөрчлөлт оруулах тухай зэрэг хуулийн гишүүдийг эмэгтэй гишүүдийнхээ хамтаар санаачлан, өргөн мэдүүлж, батлуулсан.