Нийслэлийн иргэдийн тэргүүлэгчдийн хурал хуралдаж дараахь асуудлыг хэлэлцлээ. Хүүхэд залуучуудын чөлөөт цагийг зөв боловсон өнгөрөөж, биеийн тамир спортоор хичээллэхэд зориулж  Нийслэлийн Засаг дарга долоон дүүрэгт усан бассейн, мөсөн гулгуурын талбай байгуулахаар болсон юм. Өнгөрсөн жил төсөв батлуулах үеэр НИТХ-аар нэг байгууламжийг 900 сая төгрөг, нийт долоон байгууламжинд 6,3 тэрбум төгрөг тооцож санхүүжилтийг батлуулсан ч  бодит байдалд энэ зардлаар усан бассейн, мөсөн гулгуурын талбай барих боломжгүй болжээ.

Учир нь дээрхи биеийн тамир, спорт төвүүдийн зураг төсөвт нэмэлт өөрчлөлт  орсон, газар хөдлөлтийн идэвхтэй бүсэд байрлаж байгаа тул нэмэлт бэхэлгээ, хүчитгэлийн ажлууд хийгдэхээр төлөвлөсөн, газрын байршил, инженерийн шугам сүлжээний нөхцлөөс шалтгаалаад барилгын төсөвт өртөг нэмэгдсэн тул батлагдсан хөрөнгө хүрэлцэхгүй болжээ.  Ийм үндэслэлийг улсын экспертиз гаргасан тул нийслэлийн санхүү төрийн сан, нийслэлийн зураг төслийн хүрээлэнгийн удирдлагууд энэхүү асуудлыг тэргүүлэгчдийн хурлаар оруулав. Нийслэлийн зураг төслийн хүрээлэнгийн боловсруулсан зургаар усан бассейн нь 25 метрийг харьцах нь 6 метрийн хэмжээтэй усан сэлэлтийн 2 замтай, тэнхлэгээрээ 40 метрийг харьцах нь 23,9 метр хэмжээтэй зоорийн давхар бүхий байгууламж байх юм байна.  Зоорийн давхартаа техникийн өрөөнүүд, 1 дүгээр давхартаа өлгүүр, үсчин, мини спорт барааны дэлгүүр, сэлэлтийн заал, хувцас солих өрөөнүүд, бялдаржуулах танхим, эмч дасгалжуулагч, усны шинжилгээний өрөө, зуушны газар байхаар төлөвлөжээ. Барилгын үндсэн хийц нь цутгамал төмөр бетон каркас, хучилт цутгамал төмөр бетон байх юм. Дүүрэгт бүрт газрын байршил, инженерийн шугам сүлжээний хангамжийн нөхцлөөс шалтгаалан төсөвт өртөг нэмэгдэж буйг Нийслэлийн зураг төслийн хүрээлэнгийн захирал С. Цахиур хэлж байв. Байршлын хувьд Баянгол дүүрэгт баригдах  бассейн 7 дугаар хороо 78 сургуулийн баруун талд, Сонгинохайрхан дүүргийн бассейн 17 дугаар хороо өрхийн эмнэлгийн цогцолборын баруун талд, Хан-Уул дүүргийнх 9 дүгээр хороо 7 дугаар сургуулийн баруун талд, Баянзүрх дүүрэгт баригдах бассейн 6 дугаар хороо 21 дүгээр сургуулийн хашаанд баригдахаар болсон байна. Харин Сүхбаатар, Чингэлтэй дүүрэгт мөсөн гулгуурын талбай барих юм. Чингэлтэй дүүргийн 1 дүгээр хороо 23 дугаар сургуулийн баруун талд мөсөн гулгуурын талбайг төлөвлөсөн бол Сүхбаатар дүүрэгт 10 дугаар хороо 16 дугаар сургуулийн хашаанд тус тус барихаар байршлыг тогтоожээ. Багануур дүүрэгт усан бассейн, боулингийн төвийг 3 дугаар хороо Уурхайчин цогцолборын зүүн урд талд байгуулна.  Зураг төсөв, байршлаа  эцсийн байдлаар тогтсон дээрхи барилгад шаардлагатай нэмэлт төсөвт өртгийг нэмэх саналыг тэргүүлэгчдийн олонхийн саналаар дэмжлээ. Анх асуудлыг оруулж ирэх үедээ хөрөнгийн асуудлыг нэгмөр тусгалгүй дараа нь дахин хөрөнгө мөнгө нэмж хүслээ гэж тэргүүлэгч Д. Нямхүү шүүмжлэв. Бусад тэргүүлэгчид хүүхэд залуучуудад тустай ажил болохоор асуудлыг дэмжих нь зүйтэй. Тэгэхгүй бол цаг хугацаа алдснаар  ирэх жил энэ ажил дуусах нь байтугай эхлэхгүй байж мэдэх нь ээ гэсэн байр суурь илэрхийлж байлаа.