Б.Шинэбаатар нэгдүгээр орлогчоор үлдэв

Хуучирсан мэдээ: 2017.04.04-нд нийтлэгдсэн

Б.Шинэбаатар нэгдүгээр орлогчоор үлдэв

Өнгөрсөн Баасан гаригт Төрийн өмчийн бодлого зохицуулалтын хорооноос “Эрдэнэт”-ийн ТУЗ-өөс “Монголын зэс”-ийн төлөөлөл  болох Б.Мөнхбаатар, Да.Ганболд, Б.Орхон нарыг чөлөөлж, оронд нь Эрчим хүчний яамны Төрийн нарийн бичгийн дарга З.Мэндсайхан, Уул уурхай, хүнд үйлдвэрийн яамны Бодлогын хэрэгжилтийг зохицуулах газрын дарга Д.Даваадорж, Төрийн өмчийн бодлого, зохицуулалтын газрын дэд дарга А.Дагвадорж нарыг томилсон.

Тэгвэл төрөөс 100 хувь бүрдүүлсэн “Эрдэнэт” үйлдвэрийн Төлөөлөн удирдах зөвлөл /ТУЗ/ шинэ бүрэлдэхүүнээр Орхон аймагт очиж, хуралдсан байна. ТУЗ-ийн хурал өчигдөр /2017.04.03/ нийслэлд болох байсан ч тодорхой шалтгааны улмаас Орхон аймагт хуралджээ.

ТУЗ-ЫН ХУРЛААР ҮЙЛДВЭРИЙН БҮТЭЦ, ТУЗ-ЫН ГҮЙЦЭТГЭХ ЗАХИРАЛТАЙ ХИЙХ ГЭРЭЭ БОЛОН ТУЗ-ЫН БҮТЭЦ ГЭСЭН ГУРВАН АСУУДЛЫГ ХЭЛЭЛЦЭЖ, “ЭРДЭНЭТ” ҮЙЛДВЭРИЙН ГҮЙЦЭТГЭХ ЗАХИРАЛ Х.БАДАМСҮРЭНТЭЙ ГЭРЭЭ БАЙГУУЛЖ, ТҮҮНИЙ ЦАЛИНГ 25 САЯ ТӨГРӨГ БАЙХААР ТОГТСОН БАЙНА.  ТУС ҮЙЛДВЭРИЙН ЗАХИРАЛ Х.БАДАМСҮРЭН АЖЛАА АВСНЫХАА ДАРАА 01 ТООТ ТУШААЛААРАА ӨӨРИЙН ХЭРЭГЦЭЭНД ЗОРИУЛЖ 300 САЯ ТӨГРӨГӨӨР АВТОМАШИН ХУДАЛДАН АВСАН НЬ ТОГТООГДООД БАЙГАА ЮМ.

Тэгвэл өнөөдрийн хурлаар гүйцэтгэх захирлын сарын үндсэн цалинг 25 сая төгрөг болгож, нэмэлт урамшууллыг тухай бүрд нь тооцож байхаар тогтоосон талаар эх сурвалж мэдээллээ. 

Мөн "Эрдэнэт" үйлдвэрийн ТУЗ-ийн гишүүдийн сарын цалинг 4000 ам.доллар байхаар тогтсон байна.

ТУЗ-ийн даргаар Засгийн газрын хэрэг эрхлэх газрын дэд дарга У.Бямбасүрэн, харин ТУЗ-ийн гишүүдээр Уул уурхайн яамны Төрийн нарийн бичгийн дарга Г.Нандинжаргал, Төрийн өмчийн бодлого, зохицуулалтын газрын даргын зөвлөх, УИХ-ын дарга асан Д.Дэмбэрэл, Сангийн яамны нягтлан бодох бүртгэлийн газрын дарга Б.Доржсэмбэд,  Эрчим хүчний яамны төрийн нарийн бичгийн дарга н.Мэндсайхан, Уул уурхай, хүнд үйлдвэрийн газрын дарга н.Даваадорж нар ажиллах ба тэд ийн анхны хуралдаанаа Улаанбаатараас холдож, Орхон аймгийг зорин очиж, хийлээ.

МӨН ТУЗ-ЫН ХУРЛААР “ЭРДЭНЭТ” ҮЙЛДВЭРИЙН БҮТЦИЙН АСУУДЛЫГ ЯРИЛЦАЖ, ДЭД ЗАХИРЛУУДЫГ ШИНЭЧЛЭН ТОМИЛЖЭЭ. ТОДРУУЛБАЛ, “ЭРДЭНЭТ” ҮЙЛДВЭРИЙН ДЭД ЗАХИРЛААР Ц.БАТСАЙХАН, Д.ДЭЛГЭРБАЯР,  ТУС ҮЙЛДВЭРИЙН ҮЙЛДВЭР ТЕХНИКИЙН ГАЗРЫН ДАРГААР АЖИЛЛАЖ БАЙСАН П.БАТБОЛОР, БАЯЖУУЛАХ ФАБРИКИЙН ДАРГА Д.ЭРДЭНЭЦОГТ НАРЫГ  ДЭД ЗАХИРЛААР ТОМИЛСОН БАЙНА.

Нэмэлт мэдээлэл хүргэхэд, "Эрдэнэт"-д хийж буй бүтцийн өөрчлөлтөөр үйлдвэрийн цехийн ажилчдаас дээш албан тушаалтныг бүгдийг нь сольж эхэлжээ.  “Эрдэнэт” үйлдвэрийн 49 хувь талаас томилсон бүх дарга, захирлуудыг сольж, МАН-ын “угшил”-тай хүмүүсийг томилж байгаа гэдгийг зарим эх сурвалжууд хэлж байна.

3 ДЭД ЗАХИРАЛТАЙ БАЙСНЫГ ӨӨРЧЛӨН, 4 ОРЛОГЧТОЙ БОЛГОВ

“Эрдэнэт” үйлдвэрийн Төлөөлөн удирдах зөвлөл /ТУЗ/-ийн өгсөн мэдээллээр “Эрдэнэт” үйлдвэрийн дэд захирлуудын албан тушаалыг үйлдвэрийн захирлын орлогч болгон өөрчилж,, зарим хүмүүсийг чөлөөлж, томилсон байна.

Тухайлбал, “Эрдэнэт” үйлдвэр өмнө нь гурван дэд захиралтай байсныг өөрчлөн, дөрвөн орлогчтой болгожээ. Ерөнхий захирлын Үйлдвэрийн асуудал эрхэлсэн орлогчоор Д.Эрдэнэцогт, Хөгжил, эх барилгын асуудал хариуцсан орлогчоор П.Батболор, Эдийн засаг, санхүүгийн асуудал хариуцсан орлогчоор Д.Дэлгэрбаяр, Нийгмийн асуудал эрхэлсэн орлогч захирлаар Ц.Батсайханыг нэр дэвшүүлсэн ба ТУЗ-ын хурлаар үргэлжлүүлэн хэлэлцэх юм байна.

Харин “Эрдэнэт” үйлдвэрийн нэгдүгээр орлогчоор Б.Шинэбаатарыг түр орлон гүйцэтгэгчээр томилсон байна.

Б.Шинэбаатар нь  “Монголын зэс” компанийн төлөөлөл бөгөөд Засгийн газар “Монголын зэс” компанийн 49 хувийг шилжүүлэх асуудал дуусаагүй байгаа учраас Б.Шинэбаатарыг түр орлон гүйцэтгэгчээр томилжээ.  

Бүтцийн өөрчлөлтөөр үйлдвэрийн зарим албан тушаалтан өөрчлөгдөхийг үгүйсгэхгүй гэдгийг ТУЗ-ын гишүүд хэллээ.

Ш.ОЧ

NewsMN Гар утасны хувилбар Татах
NEWS.mn

Мэдээллийн эх сурвалж