Египетийн экс Ерөнхийлөгч Хосни Мубаракийг шүүх хурал нийслэл Кайр хотын цагдаагийн академийн шүүх танхимд эхлэх гэж байна. Түүнд авилгал хээл хахуулийн хэрэг болон босогчдын өмнөөс гал нээх тушаал өгсөн зэрэг үндэслэлээр ялын дээд хэмжээ болох цаазаар авах ялыг тулгаад байгаа юм. түүний зэрэгцээ Мубаракийн хоёр хүү, Дотоод хэргийн сайд асан Хабиб Аль Адли болон бусад зургаан холбогдох албаны хүмүүсийг шүүхийн танхимд дуудах болно. Кайр хотын 3,000 орчим цэрэг, цагдаа, цагдаагийн академийн сонсогчид шүүх хурал болох танхимын аюулгүй байдлыг хамгаалах үүрэг авчээ.

Шүүх хуралд 600 орчим хүн оролцох бөгөөд Мубаракийг суулгах төмөр торыг шүүхийн танхимд урьдчилан байрлуулжээ. Өдгөө 83 настай ноён Мубарак өнгөрсөн дөрөвдүгээр сараас хойш Шарм Эль Шейх хотын эмнэлэгт цагдаагийн хяналтан дор байгаа ба шүүх хурлын өмнөхөн түүнийг эмнэлгээс нь шууд шүүхийн танхимд авчирахаар төлөвлөжээ. Египетийн телевизээр лхагва гаригийн өглөө мэдээлснээр ноён Мубаракийг шүүхийн танхимд хүргэх онгоц Шарм Эль Шейхэд газардсан байна. Египетийн Ерөнхийлөгч асан Кайр хотын Тагрир талбайд 850 хүний амийг гаргуунд нь гаргасан 18 хоногийн бослогын дараа өнгөрсөн хоёрдугаар сарын 11-нд хүчээр албан үүргээ хүлээлгэж өгсөн юм. Мубаракийн үйлдсэн хэргийг шүүх энэ цаг үед түүнд хонзон санасан Египетчүүд ид эсэргүүцлээ илэрхийлж, шүүх танхим хүртэлх замд түүнийг хороочихвий гэсэн болгоомжлол засгийн газар, ажиглагчдын дунд байгаа юм.