Боловсрол соёл шинжлэх ухааны сайд Ё.Отгонбаяр өнөөдөр нийслэлийн ерөнхий боловсролын сургууль, цэцэрлэгийн засварын ажил болоод барилгын өргөтгөлийн явц байдалтай танилцлаа. Тухайлбал, нийслэлийн Баянгол дүүргийн ерөнхий боловсролын 20 дугаар сургууль, Баянзүрх дүүргийн 62 дугаар цэцэрлэгийн засвар шинэчлэл, Багшийн хөгжлийн ордын барилгын ажлын явцтай газар дээр нь очиж танилцсан юм. Одоогоор Баянгол дүүргийн ерөнхий боловсролын 20 дугаар сургуулийн засвар шинэчлэлийн ажил бүрэн дуусч, улсын комисс хүлээж авсан бол Баянзүрх дүүргийн 62 дугаар цэцэрлэгийн барилгын засвар шинэчлэлийн ажил 60 хувь буюу дээвэр шинэчлэх ажил хийгдэж байгаа бөгөөд ирэх хичээлийн жил эхлэхээс өмнө бүрэн хийж дуусгахаар төлөвлөн ажиллаж байгаа гэнэ. Тус цэцэрлэгийн засвар шинэчлэлийн ажлын явцтай танилцах үеэр БСШУ-ы сайд Ё.Отгонбаяр болон холбогдох албаныхан дотор засал, цахилгаан шугам сүлжээг шинэчлэхэд нэмж хөрөнгө оруулалт шаардлагатай байгаа гэх хүсэлтийг хүлээн авч, ойрын хугацаанд шийдвэрлэж өгнө гэдгээ амаллаа. Уг цэцэрлэгийн барилгын засварын ажилд улсын төсвөөс нийтдээ 30 сая төгрөг төсөвлөжээ. 2011 онд улсын төсвөөс ерөнхий боловсролын сургууль, цэцэрлэгийн засвар, шинэчлэлийн зардалд нийтдээ 10 гаруй тэрбум төгрөг зарцуулж байгаа аж.