Монгол банкнаас өнөөдөр цаг үеийн асуудлаар мэдээлэл хийлээ. Энэ үеэр зарим статистик мэдээллийг Монголбанкны судалгаа, статистикийн газрын захирал Д.Ган-Очир өглөө. Тэрбээр нүүрсний үнэ өсч, худалдааны тэнцэл ашигтай гарч байгаа талаар мэдээлсэн юм.

Тэрбээр “Нийт гадаад худалдааны эргэлт энэ оны хоёрдугаар сарын байдлаар 1.3 тэрбум ам.долларт хүрсэн. Үүнийг экспорт, импортоор нь салгавал 825 сая ам.долларыг экспорт, үлдсэнийг импорт эзэлж байгаа. Ингэснээр нийт худалдааны тэнцэл 334 сая ам.долларын ашигтай гарсан. Ингэж ашигтай гарахад нөлөөлсөн гол хүчин зүйл бол экспортын өсөлт. Экспортын үнийн өсөлт дотроо нүүрсний үнэ нэмэгдсэн нь илүү нөлөөлж байна.

Нүүрсний экспорт өнгөрсөн оны мөн үеэс 280.1 сая ам.доллараар өссөн. Үүнээс гадна үнийн өсөлт бас нөлөөлж байгаа. Нүүрсний үнэ өнгөрсөн оны мөн үеэс 105 хувиар өссөн. Харин өнгөрсөн сартай харьцуулахад, 10 хувиар өслөө. Одоогийн байдлаар нэг тонн нүүрсийг дунджаар 72 ам.доллараар экспортолж байна” хэмээн мэдээллээ.

ЭХ СУРВАЛЖ: MMINFO.MN