Өнөөдөр нийслэлийн Баянзүрх дүүрэгт зарлан мэдээлэх дохиогоор дүүргийн Онцгой байдлын хэлтсээс Жуковын талбай, Зэвсэгт хүчний 027 дугаар анги буюу Батлан хамгаалах, хууль сахиулах алба хаагчдын нэгдсэн эмнэлэгт үзүүлэх сургалтыг зохион байгуулав.

Ингэхдээ газар хөдлөлтийн үеийн аюулгүй ажиллагааны “Нуугд- Суу-Хүлээ” зарчмыг баримтлан өрөө тасалгаандаа аюул багатай байрлалд өөрийгөө хамгаалах арга хэмжээг авч, ширээн доогуур орох, даацын хана, булан тохойд зогсоно. Хоёр дахь дохио дуугарсны дараа барилга, объектыг орхин гарах бөгөөд гараараа болон гарын доорхи зүйл ашиглан толгойгоо хамгаалж “Гүйхгүй, Эргэж буцахгүй, Хашгирахгүй, Түлхэлцэхгүй” гэсэн зарчмаар барилгын аврах гарцаар гарч, аюулгүй зай талбайд цугларсан юм.

Мөн дүүргийн хэмжээнд таван минут үргэлжлэх эхний дуут дохиогоор дүүргийн Засаг даргын Тамгын газар, түүний харьяа хэлтэс албад, 28 хороо болон аж ахуй нэгж, гамшгаас хамгаалах улсын албад, ерөнхий боловсролын сургууль, цэцэрлэгүүдгамшгийн эсрэг сургуулилтад хамрагдлаа гэж Баянзүрх дүүргийн Хэвлэл мэдээллийн албанаас мэдээллээ.