Афганистаны хойд хэсэгт амиа золиослогч этгээд халдлага үйлдэж хувийн хамгаалалтын албаны гурван хамгаалагч амиа алдсан байна. Халдлага Кундуз хотод болсон бөгөөд амиа золиослогч этгээд нэгэн барилгын үүдний хэсэгт өөрийгөө дэлбэлсэн байна. Түүнчлэн дээрх халдлага болсны дараа өөр хоёр этгээд барилгад нэвтэрч, хамгаалагчдын өөдөөс гал нээж есөн хүнийг шархтуулжээ. Кундуз муж Афганистаны хамгийн тайван бүс нутагт тооцогддог байсан ч сүүлийн саруудад элдэв янзын халдлага гарах нь олширч байгаа юм.

Нэгэн эх сурвалжийн мэдээлснээр халдлага үйлдэгчид гаднынхны амьдардаг зочид буудалд халдахыг зорьсон бөгөөд гадаадууд халдлага болох үед арын хаалгаар зугтаж амжсан байна.

Өнгөрсөн зургадугаар сард Кундуз хотын ойролцоо Германы цэргийн баазад амиа золиослогч этгээд бөмбөг дэлбэлж, гурван энгийн иргэн амь үрэгдэж, 11 хүн гэмтсэн. Уг халдлагыг Афганистаны удирдлагууд Талибанчуудыг үйлдсэн хэмээн тайлбарласан юм. Энэ мэтчлэн Афганистанд сүүлийн саруудад цагдаа, тэмцэгчдийн хооронд удаа дараа халдлага гарч, тайван бус байдал хаа сайгүй үүсээд байна.