Монголын телевизийн салбарт түүхэн үйл явдал тохиолдож байна. Жилийн өмнөхөн л Боловсрол суваг телевиз анх удаагаа Хойд Америкийн Үндэсний Сагсан Бөмбөгийн Холбоотой албан ёсоор гэрээ байгуулж албан ёсны эрхтэйгээр лигийн тоглолтуудыг дамжуулж эхэлсэн бол 2011 оны наймдугаар сарын нэгний өдрөөс эхлэн SportBOX суваг NBA TV-г онцгой эрхтэйгээр нэвтрүүлж эхэллээ.
NBA TV гэдэг нь тухайн лигтэй холбоотой нэвтрүүлгүүд, баримтат кино, түүхэнд үлдсэн сонгодог тоглолтууд болон улирлын тоглолтуудыг шууд дамжуулж 24 цагийн турш тасралтгүй үйл ажиллагаатай байдаг суваг юм.

Харин энэхүү сувгийг SportBOX өөрсдийн бэлтгэн хүргэдэг мэдээ мэдээлэл, нэвтрүүлгүүдтэй хослон хүргэх аж. Жилийн 365 хоног өдөр бүр цаг тутам та бүхэн сагсан бөмбөгийг хүссэн үедээ үзэж боломжийг SportBOX олгож байна.
Мөн энэхүү үйл явдал нь бүх нэвтрүүлгүүд нь хуулийн дагуу, албан ёсны эрхтэйгээр 24 цагийн турш эфирээ цацаж байгаа анхны Спортын төрөлжсөн суваг гарч эхэлснийг тодотгож байгаа хэрэг билээ.
Хэдийгээр NBA-д ажил хаялт болсон, одоогоор ямар нэг үйл ажиллагаа явагдахгүй байгаа ч SportBOX сувгаар та WNBA буюу Хойд Америкийн эмэгтэйчүүдийн үндэсний сагсан бөмбөгийн холбооны улирлын тоглолтууд шууд хүлээн авахаас гадна, 80 90-ээд оны сонгодог тоглолтыг үзэх боломжтой. Өмнө нь Монголд гарч байгаагүй энэхүү суваг нь та бүхнийг сагсан бөмбөгтэй салшгүй холбох гүүр нь болох юм.

Харин ажил хаялт зогссоны дараачаар өглөө бүр шууд тоглолтуудыг хүлээн авч үзэхээс гадна, баримтат кино, түүхэн бичлэг, орчин үеийн тоглолтуудыг хөтөлбөрийн дагуу гаргаж эхлэх юм. SportBOX сувгаас үзэгчиддээ барьж байгаа хамгийн том бэлгүүдийн нэг нь энэ юм.
Мөн тус суваг нь Дэлхийн шилдэг хөлбөмбөгийн лигүүдийн нэг болох Италийн “Сери А” Монголд анх удаагаа албан ёсны эрхтэйгээр шууд дамжуулан үзүүлэхээр болсон . Тус лигийн удирдлагууд Ази Тивтэй холбогдох зорилгоор тоглолт явагдах цагуудыг эрт болгосон тул манай үзэгчид Италийн хөлбөмбөгийн лигийг амралтын өдрүүдээр орой цагаар үзэх боломжтой болж байна.