Нийслэлийн Агаарын бохирдлын газар, Байгаль орчны газар, Эрүүл мэндийн газар, Газрын алба хамтран нийслэлийн Засаг дарга бөгөөд Улаанбаатар хотын Захирагчийн 2017 оны нэгдүгээр сарын 9-ний өдөр гаргасан захирамжийн хэрэгжилт болон иргэдийн зүгээс ирдэг асуулт өгөх зорилгоор хэвлэлийн хурлыг гуравдугаар сарын 10-ны өдөр хийсэн билээ. Энэхүү хурлын үеэр дараах мэдээллийг өгсөн юм.

50 ЦЭЦЭРЛЭГТ ДОТООД АГААРЫН ЧАНАРЫГ САЙЖРУУЛАХ 200 ТӨХӨӨРӨМЖ СУУРИЛУУЛЖЭЭ

2017 оны  нэгдүгээр сарын 10-нд Үндэсний аюулгүй байдлын зөвлөл хуралдаж, нийслэлийн агаарын бохирдлыг гамшгийн хэмжээнд хүрснийг тодотгоод аймаг, нийслэлийн ИТХ-д чиглэл өгч, цаашид хэрэгжүүлэх болон ойрын хугацаанд хэрэгжүүлэх арга хэмжээний төслийг бэлтгэх үүрэг өгчээ. Үүний дагуу Нийслэлийн ЗДТГ-ын харьяа агентлагууд төлөвлөгөө гарган ажиллаж байна. Нэгдүгээрт, Утаагүй хот 2030 төсөл болон нийслэлийн Засаг даргын 2016-2020 оны үйл ажиллагааны хөтөлбөрт тусгагдсан ажлыг хийгээд эхэлсэн гэдгийг хэлье. Хоёрдугаарт нийслэлийн агаарын чанарыг сайжруулах 4 бүсэд мэргэжлийн хяналтын  269 байцаагчид агаарын чанарт хяналт тавих давхар эрх, үүрэг өгсөн байгаа. Ингээд эдгээр байцаагч одоогийн байдлаар 1316 иргэн, аж ахуйн нэгжид шалгалт хийж, 1034 мэдэгдэх хуудас тараасан байна. Газар дээр нь 3 сая 195 мянган төгрөгийн торгууль тавьсан байна. Мөн нийслэлийн хэмжээнд үйл ажиллагаа явуулдаг уурын зуухуудад хяналт, шалгалт хийж эхлээд байгаа. Цаашид агаарын чанарыг сайжруулах зорилгоор байгаль экологио хамгаалах чиглэлээр үйл ажиллагаа явуулдаг төрийн бус байгууллагатай хамтарч ажиллахаар болжээ. Мөн одоогоор Улаанбаатар хотын агаарын бохирдол ихтэй бүсийн 50 цэцэрлэгт дотоод агаарын чанарыг сайжруулах 200 төхөөрөмж суурилуулаад байна. Энэ төсөл нь Дэлхийн банкны санхүүжилтээр үргэлжилнэ.

Түүнчлэн “Нарантуул”, “Хархорин” зэрэг томоохон худалдааны төвд ирэх дөрөвдүгээр сарын 1-нээс шинэ стандартыг хангасан гэрийн зуухыг худалдаалах албан шаардлага гарчээ. Цаашид гэрийн болон, том оврын зуухыг үйлдвэрлэдэг иргэн, аж ахуйн нэгжид хяналт тавьж ажиллах болно гэдгийг энэхүү хэвлэлийн хурлаар хэлж байсан юм.

Ч.БОЛОР